En la vida Djudia tenemos valores ke son de grande importansa. Son por lo mas, uzos, uzansas, tradisyones folklorikas... İ espesyalmente, tradisyones relijyozas testigando muestra grande kreensa en el Pueder Divino. Kuando me desido a azer un artikolo sovre este sujeto, syempre syento komo una ezitasyon. Esto proviene de mi reselo de azer algun yerro en este domeno seriozo. Portanto, yo engrandesida en una famiya tradisyonalista, desde mi chikez lo bivi esto todo i lo kontnui asigun me dikto mi konsensya.
En los diyas ke vienen, es el Taanit “Shiva Asar Betamuz”, oganyo, Martez el 15 de Julio. A esta okazyon, kero ampesar kon una chika vizyon sovre los diyas de taanit en el Kalendaryo Ebraiko. Puedemos demandarmos ansi: kualas son las razones o el eskopo del ayuno? Es posivle de rezumar estas razones en tres kategorias:
1) Arrepyentimento- (teshuva)
2) Komemorasyon- (akodrar)
3) Rekuesta - (Neder)
En realidad, analizando al fondo, se ve ke kada taanit kontiene en si estas tres razones. Ma en jeneral, dependyendo del taanit, una razon es mas dominante o mas importante. Portanto, entre todos los diyas de ayuno, ay uno uniko, sinyalado en la Tora: “Yom Kippur”. Komo lo savemos, su eskopo baziko es arrepyentimiento “Teshuva”. El regreto, el arrepyentimiento de muestras faltas o pekados. Es el diya de djuzgo i orasyon.
Ayunamos tambien en komemorasyon de los diyas de desgrasya ke bivyo el Puevlo Djudio. Son tambien diyas de rekuesta i rogativa, de orasyon. El grande savyo Rambam mos dize: “Arrogar al Todo Poderozo de salvarmos de una desgrasya, es una “Mitzva” ke mos ensenya la “Tora”. Aki el eskopo prinsipal es demandar el Ayudo Divino.
Todos konosemos los kuatro ayunos en komemorasyon de la destruksyon del “Beit Hamikdash”. El 17 de Tamuz (Shiva Asar Betamuz)- El 9 de AV (Tisha Be Av)- El 10 de Tevet (Asara Betevet) i el diya “Tsom Gedalya” en el 3 de Tishri. Estos ayunos de manadero rabiniko, mos azen rememorar las trajedias del Puevlo Djudio en el korso de la Historia.
El Taanit de “Asara Be Tevet” es para komemorar la primera “invazyon” de Yerushalayim, por los Babilonianos. En los anyos d’alkavo, este diya es tambien el Diya de Kadish para los ke fueron eksterminados myentres la “Shoa”. El 17 de Tamuz se aze Taanit en komemorasyn de la kayidura de Yerushalayim, despues de fuertes batalyas durante munchos mezes. Tres semanas despues de la okupasyon de la sivdad por el enemigo, en el 9 de AV, el “Beit Hamikdash” fue destruido. “Tisha Be Av”, diya de ayuno, aniversaryo de la destruksyon del Templo de Yerushalayim...
El 13 de Adar es el Taanit de Purim, konosido tambien komo Taanit Ester. Es un ayuno teniendo el buto de akodrar. Aki vemos la fuersa de la kreensa, en akodrandomos la desfecha de la sataneria de Aman. Komo en kada taanit, tambien formulamos muestros arrepyentimientos, rogamos i suetamos bueno para la Umanidad. Lo ke kero dizir es ke en kada ayuno se puede ver los indisyos de los tres eskopos: Arrepyentimiento, Rekuesta, Komemorasyon...
Arresividos ke seyan…Amen.
