Un muevo “sesar el fuego en Gaza” fue anunsyado Lunes el 11 del mez koryente... Ke sera su rezultado?
La semada pasada, (Martes el 5/8/2014) despues la akseptasyon de parte de los dos belijerantes del primer “sesar el fuego” del konflikto armado entre Israel i el Hamas, la esperansa paresia de muevo enfloreser en los korasones. Ma la trega fue kurta; i antes mizmo ke este tyempo de akalmia tome fin, roketas ya empesaron a ser proyektadas por el Hamas sovre Israel a las kualas la armada aeryana hebrea se topo en el ovligo de ripostar.
Una kestyon vyene kon grande frekuensa al esprito de varyas personas, i partikularmente de munchos gazeteros: “Ken va salir viktoryozo?”. La repuesta es malorozamente muy simple: ‘la Muerte’, ‘el triumfo kolosal del dolyo sovre la Vida’, ‘de las tinyevlas sovre la luz’ i ‘de la tristeza sovre la alegria’.
Los shifros son probantes… 1800 muertos en el kampo Palestinyano entre los kualos munchos siviles, mujeres ansi ke personas aedadas i aproksimativamente 400 ninyos sovre los kualos munchas madres djudias yoran endjunto kon las Palestinyanas. Ke sinyifikan estos shifros? Difisil de pueder responder.
La muerte no es solo destruktora de vida, ma tambyen de miles i miles de posibilidades para el futuro… destruktora de evolusyon, de enkaminamyento en direksyon de la sivilizasyon i de una posivle solidaridad entre kriansas humanas ke fueron enemigas, esto kon el tyempo despues varyos dubyos, i sospechos.
Oy el syelo esta kargado de nuves pretas. El evento ke dyo el sinyal imperativo de partensya a la furor de esta gerra, fue inkontestavlemente la kaptura de los 3 adolesentes djudyos, 3 estudyantes de una Yeshiva dedikada al kumplimyento de mitsvod relijyozas, matados de una manera bestyal kaji immedyatamente despues de aver sido arrevatados…
Desde la deskuvyerta de sus puerpos lnanimados, la atmosfera se obskuresyo totalmente entre el Hamas i el Governo Hebreo. Ansi, desde los primeros dias del litijyo, motivada por los tiros de roketas (de parte de los Djihadistos de Gaza) sovre las tyerras djudias, fue la intervensyon de las fuersas aeryanas Israelyanas.
Entonses empesaron en la prensa de varyos payizes, kritikas kontra Israel el kual se esforso kon razon de destruir los aparatos kon los kualos las dichas roketas eran embiadas, aparatos ke desgrasyadamente fueron ekspresamente plasados en los baryos los mas populozos de la rejyon.
Varyos shefes de payizes pro-Palestinyanos demandaron mizmo ke Israel sea kulpabilizado por ‘krimen de gerra’ sin tomar en konsiderasyon ke los 400 ninyos Palestinyanos inosentes no muryeron realmente por un kualkyer akto de krueldad del adversaryo, ma de sus propyos serkanos ke los tomaron komo mamparo.
La aviasyon Hebrea tyene syempre komo prinsipyo moral de prevenir los okupantes de kualkyer morada sivil enemiga ke sera abatida porke munisyones de gerra son guadradas aya, afin ke los moradores salgan immedyatamente kon sus vyejos i sus ninyos i se aleshen del lugar.
Ke puede azer de mas Israel kuando deve intervenir en este espasyo de aborresimyento ke devino Gaza? Kuando tuneles fueron kavakados de parte del enemigo debasho de sivdades djudias … tuneles fraguados sin dubyo afin de pueder (un dia o una noche) surjir bruskamente sin preavizo i molestar los moradores?.
Es posivle ke involuntaryamente uvo tambyen faltas difisilmente evitavles en algunos sentros de komandamyento de la armada komo de la marina hebrea, tal la muerte de los 4 ninyos ke djugavan serka de la mar o byen el bombardamyento ke destruyo parsyalmente una eskola de la ONU.
A este sujeto me permeto la kestyon sigyente: İnkontestavlemente, una eskola es moralmente muy valutoza… una eskola es el lugar sakro ande enflorese lo ke sera el futuro de la humanidad…Ma, kuando en eya se topa eskondidos varyos djeneros de armas para destruir la egzistensya de miles de otras personas, es ke esta eskola no pyedre su sakralidad?
Ay entre los kombatantes İsraelyanos i los del Hamas una diferensya esensyal… Los kombatantes Djudyos luchan por la vida, sus objetivo es la sovreguardya de la vida… Los kombatantes djihadistos tyenen komo eskopo prinsipal la muerte del enemigo… Sus prinsipal objetivo es de salir viktoryozo de una batalya kontra el ke no es de sus fey.
