Mezmo ke Tu B’Av es un diya de fiesta komo esta eskrito en el Talmud, esta fiesta empeso a selebrarse en los anyos dalkavo en İsrael. Tu B’Av se selebra kon bayles, rozas koloradas, i kantikas de amor en la radio.
Las paredes de Yerushalaim fueron, un tiempo, la fuente de enspirasion del amor. Miles de anyos antes, kuando dainda el mundo no aviya oyido el diya de San Valentino, el mundo judio aviya kreado un festival de amor en el sentro de Yerushalaim.
Debasho del lunar en kinze, en los diyas de enverano, las mansevas vistidas en blanko, baylavan en los kampos, afuera de las paredes de Yerushalaim. Los mansevos se ivan a los kampos kon la esperansa de topar una novia. Esta fiesta se yama Tu B’Av porke se selebra en el kinze del mez ebreo de Av. Tu B’Av se selebra una semana duspues de Tisha B’Av, el mas triste diya de los judios.
Tu B’Av se selebra afuera de las paredes de Yerushalaim, leshos del Monte de Templo, el lugar de la destruksion.
Tisha B’Av es el diya kuando el Dio deklaro ke los judios vana pasar kuarenta anyos en el dezerto. Tu B’Av es el diya kuando kuarenta anyos duspues, los 15.000 israelianos ke kedaron de la jenerasion del dezerto, entraron a la Tierra Prometida. En este diya, el Dio pardono el puevlo judio por el pekado ke aviyan echo: aviyan konstruido un bekerro (buzağı) de oro, i duspues empesaron a adorarlo.
En el Talmud eskrive ke ‘nunka no uvo en İsrael, mijores diyas ke del kinze de Av, i el Diya de Atonmento (Kefaret Günü).
En Tu B’Av, las ijas de Yerushalaim baylavan en las vinyas, kantando ‘Mansevos, alevanta los ojos, i mira kuala manseva vaja eskojer. No fiksesh los ojos solo a la ermuzura, ma mira ke la ija ke vaja eskojer seyga de buena famiya. La ermozura vos puede trompar, ma la mujer ke tiene espanto del Dio, es la mas alavada’.
Deke el anyo judio eskapa kon una selebrasion de amor? Una repuesta a esta kestion es ke ‘el judaizmo da muncha emportansa al amor en las relasiones’.
En Tu B’Av, todas las mansevas i los mansevos se visten vistidos blankos porke blanko es la kolor de la semplisidad. Esto kere dizir ke las valores materialistas no deven enfluensar los mansevos kuando vana eskojer una partenera. Los mansevos deven de mirar debasho de las valores superfisiel, antes de kazarsen.
Tu B’Av es un grande diya para bodas, seremanias, azer propozisiones de kazamientos. Es el diya de amor ke se selebra kon kantes, bayles, rozas, i meldando la Torah. En esta fiesta se pasa mas muncho tiempo meldando la Torah, porke los diyas santos empesan a aserkarse.
