Herensya puede ser del esklavajizmo antiguo o byen de la revolta kontra el kolonyalizmo oksidental del dyez i mueven siglo, la salvajeria aktual parese inforteserse en varyos lugares del globo terresto a la mizma kadensya (i kon la mizma rapides) kel progreso syentifiko i el adelantamyento de la sivilizasyon, en otros puntos del mundo.
Envezes al seno mizmo de payizes ke ayegaron a un nivel bastante alto de kultura komo la Fransya i la İngiltera, vemos ke (despues del arrivo de muevos migrantes de sus vyejas kolonias) se produzyo situasyones ekivokas ande, kuando los unos estudyan i lavoran, otros se integran a grupos fanatikos por la mas parte heterojenos en sus esensya, echos jeneralmente de reziduos radikales de otras formasyones djihadistas.
Espesyalmente en este momento, en diferentes payizes del Oriente Medyo i de la Afrika İslamista, se desvelopan ‘esferas dedikadas al obskurantizmo i a un ideal sometido a la atraksyon irrezistivle de la muerte, komo tambyen de una voluntad absoluta de dominasyon sovre los otros’, tal Al Qaida i sus nebulozas ke atakan de preferensya sentros publikos muy puevlados o Boko -Haram en Nijerya ke se esforsa de destruir espasyos estudyantinos afin de erradikar kualkyer kultura otra ke relijyoza i kapturar de preferensya eskolaryas de otras kreensas para venderlas komo esklavas,.…
İ resyentemente en Siria i Irak, vemos surjir el grupo ultra djihadisto nombrado “EIIL--- İŞİD“ ke (byen armado i kon el ayudo de syertos grandes Estados Arabos) okupo militaryamente, sin ningun derecho ni legalidad, sivdades kurdistanas i sus entorno en el kual la populasyon Yezid desendyente de un puevlo antiguo bivia pasifikamente en tyempo normal, ma ke aktualmente se topa parsyalmente en el ovligo de fuir en las montanyas ande sus myembros riskarian de murir de ambre sin la bendicha kontribusyon de los Kurdes , de la Evropa i de la Amerika.
Al pareser, esta obskura nebuloza ke igualmente opera malorozamente kon grande sukseso en Siria, tuvo tambyen el objetivo de reestableser en Irak ’’el Kalifato’’ ke fue disoluto kompletamente en Turkia en el anyo 1924 .
Ansi, el 29/6/2014 el “ Estado Islamiko en Irak i en el Levente“ fue fundado i el Kalifato fue por ansi dezir re-establesido debasho el pretensyozo komandamyento del İŞİD/EİİL.
Charles Lister ’investigador asosyado al brookings Doha Centre’ dize ke: ’’De un punto jeografiko, el Estado Islamiko ya es perfektamente operasyonal oy en dia en Irak i en la Siria, i parese aver establesido su prezensya en el Lebanon. De mezmo, el tyene partizantes en Jordania, Gaza i el Sinai, komo tambyen en la İndonezia, Arabia Saudita i otros lugares .’
Simultaneamente de otra parte, en un video de 52 minutos, Abubakar Shekau, shefe del grupo armado Boko Haram, deklaro el tambyen un Kalifato Islamiko en Gwoza, sivdad del Norte-Este de Nijerya, malgrado la opozisyon del prezidente de este payis.
Uno de los puntos los mas sorprendyentes del djihadizmo absoluto moderno es su fuersa de atraksyon sovre nombrozos jovenes ke probablemente tuvyeron la okazyon de frekuentar eskolas laikas ma ke syempre persisten a sigir syegamente preseptos en ningun kavzo adekuados al nivel de evolusyon aktual.
Una kestyon mos vyene al tino : ‘’Ke pudo ser la reaksyon de estos mansevos kuando en varyos diaryos vyeron por seguro el puerpo salvajemente dekapitado del djornalisto amerikano James Foley ? ‘’
