Simple koinsidensya o puede ser voluntaryamente, Barack Obama eskojo la data del 10 del mez koryente, un dia antes el tredjen anniversaryo de la terrivle trajedia ke fue la destruksyon de las dos tores del World Trade Center, para deklarar la gerra al muevo Estado djihadisto de Irak.
Aun ke no era el primer akto de vandalizmo perpetrado kontra la populasyon oksidental, la demolisyon del World Trade Center en New York (sivdad ke de todo tyempo aksepto el kosmopolitizmo de su populasyon i ande se ve syempre sirkular libremente personas de varyas kolores de kuero, vestidas kada una segun su voluntad) fue un shoke psikolojiko eksepsyonal sovre la sensibilidad kaji mundyal en su konviksyon inebranlavle de una Amerika del Norte konsiderada komo una potensya inatakavle sovre sus tyerras,
La vizyon (kontinualmente proyektada en la televizyon) de las dos tores ke eran entonses el Sentro Komersyal del mundo, kortadas en dos por aeroplanes yenos de produktos eksplozivos, paresia un sonyo krual kel meoyo humano refuzava de akseptar.
Me akodro el terrivle momento de insuportavle inkyetud ke resintimos entonses mi marido i yo ke teniamos en los Estados Unidos keridos muy muy serkanos “muestras dos ijas, sus maridos i ijos” asta resivir las primeras novedades, i este sentimyento de insertidumbre komo un kontinual presentimyento de un reziko iminente ke ainda oy me obseda personalmente despues la muerte de mi kompanyero de vida.
A partir de este dia, la populasyon sivilizada en ke kontinente i de kuala relijyon ke sea, kedo por syempre en estado de espanto i perpleksidad, presentyendo (de una manera munchas vezes konfuza) el empesijo de una mueva epoka ande puedran produzirsen akontesimyentos i fenomenos imprevizivles nunka imajinados asta muestros tyempos.
Ay de esto unos kuantos anyos uvo la esperansa ke la mundyalizasyon puedria puedeser dar rezultados pozitivos grasyas a enkontros de mas a mas frekuentes de personas diferentes, las kualas (pensavamos) parvyendran ansi a mijor konosersen i sovre todo akseptarsen las unas las otras .... ma el rezultado no fue briyante.
Oy, semos testigos ke las migrasyones en varyos payizes evropeos de personas nasidas en la Afrika o otros kontinentes orientales, no produzyeron ningun aserkamyento entre eyas, ma al kontraryo un sentimyento de rivalidad i ansi de sospecho resiproko ke las alesho ainda mas las unas de las otras..
İ lo mas estranyo es ke los ijos de los migrantes ke nasyeron en los payizes de akolyo i tuvyeron la posivilidad de resivir la mizma edukasyon eskolarya ke los ijos de los orijinaryos del lugar, syenten munchas vezes una enemistad ainda mas grande por los reales otoktones..
Oy en dia, los muevos venidos son dezeozos no solo de konservar sus kreensas relijyozas ansi ke sus paradigmos i preseptos , ma de impozarlos tambyen a los otros.
Ansi, desde unos kuantos anyos vemos ke en Fransya una multitud de jovenes partyeron por la Siria i otros payizes ande el djihadizmo es muy aktivo, para resivir la formasyon adekuada a este djenero de aktividad kriminal i revinyeron en el eskopo de endoktrinar en este mizmo senso otros adolesentes i pusharlos a perpetrar eyos tambyen aktos asasinos kontra etnias ajenas sosyalmente asimiladas al puevlo ke les dyo la hospitalidad, tal ke fue el kavzo del horrivle atentado ke eskojo un eskola djudia en Toulouse ande ninyos inosentes toparon kruelmente la muerte.
A este sujeto, avro una paranteza para komunikar a muestros lektores, ke en el payis de Descarte, segun el rezultado de una enkuesta echa por el CRİFT, el shifro de aktos antijudaikos pujo de 90% durante los 7 primeros mezes del anyo 2014 komparativamente a los del anyo 2013.
Aktualmente se topa en varyos payizes oksidentales selulas invizivles djihadistas de aparensya absolutamente lnosente, ke asperan el orden de entrar en aktividad, komo fue el kavzo de varyos aktos kriminales en los Estados Unidos a los kualos no se pudo dar una otra eksplikasyon...
Es ansi ke despues la dekapitasyon de los dos djornalistos amerikanos i de un humanitaryo İngles, se puede pensar ke uno de los prinsipales objetivos del prezidente de la Amerika del Norte es de aflakar lo mas posivle la armada de la grande Selula djihadista İŞİL/EİİL asta azer de eya una entidad ideolojika inkapavle de danyar.
Es ke Barack Obama puedra obtener el rezultado dezeado? Esto, los dias a venir lo diran.
