La Santa Biblia mos dize: (Num. Bamibdar 29_1) “..El primer Diya del syeten Mez selebraras una Fyesta Solemna: Roshashana...” Es el empesijo del Anyo Djudio. Ma, ay de preguntarmos deke el 7en mez i no el primer?. Antes de responder a esta pregunta, kontinuaremos a meldar… “... En el dyezen Diya de este mizmo syeten Mez, umilyarash vuestras almas, no azerash dingun echo :Yom Kippur… El kinzen Diya del syeten Mez, no azerash dinguna aktividad umilyante, durante 7 Diyas selebrarash una Fyesta en la Onor del Kriador:La Fyesta de Sukkot…
El Kalendaryo Ebraiko ampesa el anyo kon Tishri. Alora deke la sitasyon “syeten mez?”. Porke, la vida del Puevlo Djudio ampeso kon la fin del “yugo”, del esklavaje de Misraim, en el mez de Nisan. İ, sigen los mezes İyar, Sivan, Tamuz, Av, Elul i Tishri, el 7en Mez. La Libertad es la baza de un puevlo.
Roshashana, Kippur, Sukkot i Simhat Tora…Byervos de los otonyos de mis syete, ocho anyos ke, para mi teniyan una sola sinyifikasyon: fin del enverano i ir a la eskola. Doz, tres anyos despues, trokaron de sensyo para la ijika mas entendida!! i fueron sinonimos de una fyesta inkomparavle, seguida de un diya interminavle (mil ekskuzas por este byervo) de taanit i orasyones. Fue alora, ke mi defunto nono (en paz ke repoze), sintyo el menester de darme eksplikasyones i syertas nosyones, portanto simples sovre estos diyas. El resto, la vida i los anyos me lo ambezaron.
Desde muncho tyempo ya se ke son byervos ke kada Djudio emplea en los diyas redutavles mas muncho ke syempre. Son diyas nombrados YAMIM NORAIM, en loskualos, mos djuzgamos, envestigamos muestro komporto durante el anyo. Tornamos verso D., eksprimiendo arrepintir i demandando pardon. Diyas ke mos aparejan a YOM KIPPUR.
Tishri, primer mez de la aynada ebraika, es una suksesyon de fyestas de Roshhashana a Simhat Tora. Ma este mez no es solamente mez de fyestas, es tambien mez de orasyon i pardon. Yom Kippur, diya importante de Taanit i Orasyon. El grande savyo, Moshe Ben Maimon (Maimonides 1135-1240) dize: “En esta perioda el umano deve ser konsiderado komo medio kulpante, medio inosente…”
Es una mitzva ke mos ordena la TORA,de kantar el SHOFAR* el diya de Roshashana i de dezir “Oy estamos selebrando la kriasyon del mundo”.-Hayom Harat Olam. Roshashana es la unika fyesta relijyoza ke se selebra tambyen doz diyas en Israel. 10 Tishri, Yom Kippur, diya de demandar pardon de pagamyento de los pekados. Enfin, la fyesta de Sukkot i Simhat Tora…
Oganyo, Yom Kippur esta koensidando kon el primer diya de la importante Fyesta Muzulmana, el “Kurban Bayramı”.Esto me izo akodrar un evento. Si no me yerro, del anyo 1948. Kippur akel anyo, aviya kayido el mizmo diya de Kurban Bayramı, egzaktamente komo oganyo. Estavamos pasando las fyestas en Halki (Heybeli Ada). Akeya epoka no aviya dayinda Keila en Halki. Al lado de la kaza ke aviyamos alkilado por la sezon, aviya una grande kaza de tavla, una rezidensya kon una guerta imensa, ande se ordenava tambien la Suka. Esta kaza aparteniya a la famiya Bozaldo ke kada anyo, en los Moadim la avriyan a la Komunidad Djudia de Halki..
El Yom Kippur del 1948 no me lo olvido. Mis paryentes deviyan, akel mizmo diya vijitar los proprietaryos muzulmanos de la kaza ke aviyamos alkilado en Halki. İ, lo mas importante, al diya ivan a partir al “Memleket” (sivdad de nasimiento). Dunke esta vijita de Bayram no se pudiya atrazar…Un estado delikado, ke estava preokupando enormamente mi kerido Papa (de b m). Finalmente se arranjo kon el entendimiento lojiko del balabay, ke ya konosiya las tradisyones djudias i sus importansa…
Komo dishimos mas arriva, la Libertad es la baza de un Puevlo, de una Nasyon. Terminaremos kon un pasaje ke tomi de un manadero anonimo: “Roshashana, literalmente la Kavesa del Anyo, es el diya de Djustisya. Akodraremos syempre el prinsipyo ke fue establesido por los Djudios, antes miles de anyos. “Libertad i Djustisya”, baza sin lakuala dinguna Nasyon puede egzistir”.
SHANA TOVA-HAG SAMEAH
* El shofar, en los eventos antiguos eskritos en la TORA, se uzava para indikar el Shabbat, la mueva Luna o la konsakrasyon de un muevo Rey. Oy, en Israel, se uza el Shofar, mientres la seremonia de djura del Nassi.
