Kada anyo, en los mezes de autonyo es la emosyon ke prokura la distribusyon de los premyos Nobel a los mas meresyentes en varyos ramos de la sivilizasyon: la Syensya, Filozofia o Literatura, Ekonomia i tambyen a todos los grandes ombres politikos ke ovran por la paz i por la armonia entre los varyos governos del mundo.
Este anyo, el premyo Nobel de la paz 2014 no fue atribuido (komo jeneralmente es el kavzo) a personajes de grande estatura publika ke se esforsan de rezolver problemas politikos entre payis en estado de konflikto grave, ma a los esforsos individuales de dos simples sitizanos: la pakistaneza Malala Yousafzal i al İndyano Kailash Satyarthi.
La primera: Muzulmana, “Malala Yousafzal” por su kombate ardyente en favor de la eskolarizasyon de las ijas en el Pakistan su payiz de nasimyento, lo ke puedra salvar munchas de entre eyas de syempre bivir en un estado de sometimyento absoluto delantre kualkyer ombre ke sea: padre, ermano o marido.
En la edisyon de su “djornal de una eskolarya” Malala Yousafzal denunsya las violensas de los talibanes, los kualos metyeron fuego en el anyo 2007 a las ‘eskolas para ijas’ i asasinaron los ke salian kontra.
A notar tambyen ke komo vo lo aviamos komunikado el anyo pasado en esta mizma pajina del Shalom, Malala avia entonses obtenido el premyo Sakharov atribuido de parte del Parlamento Evropeo.
El segundo: Hindu, “Kailash Satyarthi” ke desde 25 anyos lucha kontra el lavoro de los ninyos en fabrikas malsanas, impedidos ansi de ir a la eskola i de tener kualkyer posibilidad de akseso a un futuro mas humano.
Un komentador mos dize a este sujeto ke: “mizmo si el esklavaje fue ofisyalmente prohibido en las İndyas, aktualmente ‘fruto de la provedad i de la mizerya’ el no fue nunka eradikado enteramente.
Kailash Satyarthi shefe de un grupo dedikado al adelantamyento de los ninyos i adolesentes, parvino al reziko de su propya vida, a salvar 80.000 de entre estas kriaturas ke lavoran en atelyes dirijidos de parte de patrones sin ningun eskrupulo.
Para kada uno de entre los ke fueron salvados, varyos kaminos puedran ser avyertos mas tadre, entre los kualos el eskojera el mas adekuado a su personalidad i su kapachidad.
Los ninyos i ninyas de oy, rikos o proves, son potensyalmente muevos adultos humanos en formasyon, kon munchas vezes en eyos los embriones de lo ke seran mas tadre sus ideas, aspirasyones i reaksyones
“Malala Yousafzal” i “Kailash Satyarthi” lucharon para ke kada uno de entre eyos tenga los mizmos derechos a una chikes humana ke los ayudara, en los anyos a venir, a mijor eskojer el kamino a sigir.
“La atribusyon del premyo Nobel a semejantes personas’’ tyene en este momento una importansa krusyal…Eya se revela komo una egzijensya moral de humanizmo en un Universo en peligro de disolusyon i ke parese parsyalmente undirse en la salvajeria.
No se si realmente fue en esta intisyon ke los myembros del komite Nobel desernaron el ilustre premyo a los dos loreatos; en todo kavzo, eyos afirmaron grasyas a sus aktos i inisyativas, ke kon el konkorso de idealistos, muncho puede ser salvado en muestro mundo.
Mozotros djudyos ke fuimos un largo tyempo pelegrinos sin tyerra definitivamente fiksa, en kondisyones munchas vezes insertanas i prekaryas, puedemos entender la valor de semejantes aktos. La vida mos ambezo ke todo no es definitivamente preto…munchas vezes uvo en las tinyevlas ke mos entornavan chikos rayos de sol ke, eyos, mos pushavan en direksyon de la verdadera luz.
İ oy, ken ke seyamos, potentes o simples aderantes al espasyo ke mos entorna, todo mos toka de serka o de leshos, todo tyene un impakto mas o menos violente (aun envezes imperseptivle) sovre muestro destino i ansi mos ovliga a no kedar indiferentes a ningun sujeto.
Komo lo disho Rabbi Nahman de Bratislava: “Si kreyes ke todo puede ser destruido, deves tambyen kreyer ke todo puede ser adovado o rekonstruido.”
