El eskrivano Fransez Patrick Modiano gano el Premio Nobel de la Literatura 2014. Modiano tomo este premio por su estudio de la okupasion nazi i sus efektos en su pais.
Patrick Modiano nasio en Paris en el anyo 1945, dos mezes duspues de la II Gerra Mondial. Su padre Alberto Modiano era judyo italiano, i su madre era katolika. Su padre era un desendiente de una famoza famiya sefaradi de Salonika. Su madre Louisa Colpijn era una artista. Alberto i Louisa se konosieron en los anyos de la okupasion. Patrick fue baptizado en la edad de sinko anyos, i izo sus estudios en eskolas katolikas.
La Akademia Sueza le prezanto este premio diziendo ke Modiano gano este premio por ‘el arte de la memoria’. Kon su memoria, Modiano evoko la vida detras la okupasion de los nazis, i los destinos umanos. En sus livros, puedemos topar los mas chikos detalyos de la vida de la okupasion.
Mezmo ke Modiano fue elevado komo un katoliko, estudio en eskolas katolikas, i no tuvo dariyaver kon los judios, todo lo ke eskrivio, son kozas sovre la okupasion de los almanes, i los judios, durante esta epoka negra.
En el anyo 1968, kuando teniya vente i tres anyos, Modiano eskrivio su primer livro ‘La Place de l’Etoile’ Los fransezes lo konosieron kon este livro. El livro empesa kon una sena chokante. En el anyo 1942, un ofisie alman le demanda a un mansevo, ande se topa la Place de l’Etoile (el lugar de la estreya). El mansevo ke era judyo, en lugar de amostrarle el adreso ke el ofisie demando, le amostra la parte siedra de su korason, ande los judyos deviyan meter la estreya amariya. Esta entroduksion ya es bastante para entender el sujeto del livro. En este livro, Modiano se esta burlando de Hitler, esta kritikando el rasizmo, i esta kritikando la Fransia por sus aktos antisemitikos de los anyos pasados.
Anyos duspues, el livro ‘La Place de l’Etoile’ fue reklamado en la Almanya komo una grande Post-Holokosto ovra. La traduksion del livro en la lingua almana lo izo ganar un premio. Este livro fue traduizado en sinko linguas ma no fue publikado en ingles.
Modiano no paso una chikes oroza. En la segunda gerra mondial, su padre tuvo relasiones kon el gestapo, no tuvo menester de meterse la estreya amariya, i se mesklo kon echos suzios. Por munchos anyos, Modiano bivio kon la verguensa de su padre. Kuando teniya kinze anyos, su padre muryo. Su padre no biviya kon eyos, porke ya se aviya kitado de su madre. Komo su madre era artista, eya no teniya tiempo de okuparse de sus ijos. El ermano chiko del ekrivano muryo kuando era muy chiko. Esta chikes negra lo enfluenso muncho. Mezmo en sus livros, ay una bushkita de identidad. Sus livros estan reflektando las traumas del pasado kon una umor amarga.
El Premio Nobel no es el primer premio ke Modiano gano. Ya aviya ganado otros premios mas antes. Modiano fue obsesionado kon la period difisil, i averguensado de la okupasion i del komporto de su padre. Por esta razon, el mezmo sujeto se esta repetando en todos sus livros. ‘Duspues kada livro, tengo la empresion ke ya eskrivi todo lok e keriya’ esta diziendo Modiano, ‘ma duspues, ya se ke va tornar atras a los chikos detalyos, i a las chikas kozas ke me azen lo ke so yo. Ma, no es muy naturel? Kada uno de mozotros, somos determinados por el lugar i el tiempo ke nasimos’.
