El 26.10.2014 alhad, fue un dia reushido:
El dia evropeo de la kultura djudia en Estambol.
Alhad demanyana asistimos kon mi marido a la ekspozisyon ke tuvo lugar en el sentro del empleo ‘İstinye Park’.
Unas kuantas mujeres volontaryas estavan distribuendo (dağıtmak) un jurnal de 4 ojas ande; estava eskrito kon detalyos; la istorya de los djudyos en Anatolya en la Turkiya, los djudyos de Turkiya en la vida de la komunitad, las sinagogas en Turkiya, las tradisyones i las fyestas de los djudyos turkos…i munchas otras enformasyones sovre eyos.
Una ekspozisyon kon un kontenido muy ancho (geniş kapsamlı); mostrando los materyales i los objektos emportantes del kazamyento, de la paridura, del brit-milla, de la bar- i bat-mitsva, de los funerales, de la vijola, de una meza perfekta de shabat, i de las fyestas prensipales komo; Rosh-Ashana, Kipur, Pesah, Şavuot i Sukot.
Entonses; el eskrivano Maryo Levi kon Ayşe Kulin i Bensiyon Pinto kon Zülfü Livaneli sinyaron sus livros ke tuvyeron grande sukseso.
Otra ekspozisyon en la sinagoga de Ortaköy; del artisto famozo; eskrivano, poeto i pintor Habip Gerez ke tuvo munchos vijitadores.
Despues de midi; en la sinagoga majestuoza i la mas ermoza de Estambol, en Neve-Shalom; tuvo lugar una boda represantativa (temsili) kon 650 partisipantes de todas las umas. El rav İzak Alaluf kon su turko perfekto dyo a entender todo lo ke se pasa en una boda djudiya del empisijo fina la fin. Todos los ke asistyeron muy enteresados i kontentes se enkantaron de ver esta seremoniya.
A las sej de la noche; en el ‘Kal de los Frankos’ ke es oy la ‘Sinagoga de los İtalyanos’; el governo Italyano onoro el sinyor Nissim Behar, kon la ‘Medalya de la Estreya del Estado İtalyano’; i los dirijentes de esta sinagoga organizaron una fyesta.
El konsolo de Italya, de la Espanya, de Venezuela, los dirijentes del estado de Turkiya, muestro Grande Rabino Rav İsak Haleva, el Presidente de la komunitad djudiya İshak İbrahimzadeh kon su mujer, los dirijentes de muestra komunitad, la famiya de Nissim Behar, sus amigos i sus keridos asistyeron a esta fyesta ekselante, por akompanyar i por partajar la alegriya del sinyor Nissim Behar ke fue tambyen el presidente de la komunitad italyana djudiya, anyos largos en Estambol.
En primero, Rıfat Behar, el ermano de Nissim ke tyene la misyon agora de la prezidensya de la komunitad italyana, izo una avla en azyendo konoser su ermano grande i todo lo ke izo en su vida muy aktiva.
Despues de la avla de la konsola Italyana kon munchas alavasyones; el Grande Rabino Rav İsak Haleva kon el Presidente de la komunitad djudiya İshak İbrahimzadeh; avlaron sovre su kapachitad i su reushimyento en su vida de famiya, de echo i de volontaryo.
Lo mas sinyifikativo para mi fue; la avla de su inyeto Beri Koronyo ijo de Viki i Anri Koronyo la primera ija de Mr. Nissim.
Fue una avla yena de amor, vinyendo de aryento del korason.
En el empisijo de su avla Beri; remersyo a todos los ke asistyeron a esta fyesta, en dizyendo ke los partisipantes onoraron en este lugar Santo, su granpapa Nissim Behar i toda su famiya.
“Yo so el primer inyeto preferado de Nissim Behar.
El fue para mi; un ombre muy fursudo, puederoso en todo modo punto de vista, todas sus miradas kon ekspresyon (ifadeli), todo lo ke avla djusto, todos los movimyentos konsistyentes (tutarlı).
La egzistensya la mas presyoza, la mas valutoza, el lider de muestra famiya; es la onor la mas grande de ser el avlador (konuşmacı) en esta fyesta ke se organizo por mi granpapa…
Ken es Nissim Behar?
El nasyo en 1926 en Estambol i estudyo en la eskola italyana.
Paso una chikes muy difisil. En 1949 se kazo kon mi nona “Raşel”. Ay mas de 55 anyos ke son kazados, i sus vidas esta kontinuando kon muncha armonia, respekto i amor.
Nissim ampeso a lavorar en 1947 en la Banca Commerciale Italiana i 35 anyos lavoro kon muncha ardor en diferentes pozisyones. Despues ampeso a lavorar en el Holding Profilo durante 13 anyos.
El fue el monumento (abide) de la estabilitad (istikrar), de la apartenensya (aidiyet) a su echo, i del profesyonalizmo.
Kuando penso a ser retretado (emekli), ya aviya pasado 65 anyos de lavoro en su vida.
Allado de su vida profesyonal, el fue muy responsable enverso de su komunitad i lavoro komo volontaryo anyos largos en diferentes organizasyones i asosyasyones de muestra komunitad. Mi granpapa Nissim; en la famiya ke tuvo, dyo muncha emportansa a las relasyones familyales i syempre kijo ke todos los myembros seygan atados unos kon los otros kon amistad i kerensya.
Nissim Behar es un ermano responsable, un marido ekstraordinaryo, amoroso de sus tres ijas, ke este en ganeden
‘Bekita’ su ija den medyo; ke ama muncho sus yernos, i sus inyetos i inyetas.
Kada myembro de muestra famiya tyene un numero. Yo so el numero 7, la de alkavo ke tuvo la shans de entrar a muestra famiya Melis es el numero 23.
El tyene 3 ijas, 3 yernos, 6 inyetos, 4 mujeres de inyetos, i 5 inyetos chikos, kon su mujerika kerida Raşel i el; 23 personas ke se asentan a la meza en las fyestas.
Es muy seryozo, muy novle i se viste muy elegante. No se olvida nada, tyene una memorya formidavle.
Kerido granpapa, oy todos estamos aki por onorarte. Tu fuersa i tu luz ke no manke de muestra famiya.
Te esto ogurando una vida kon sanedad i kon repozo.
Te estamos remersyando, por ke mos izites bivir esta onor muy grande a muestra famiya”.
A la fin de la avla de Beri Koronyo; el pianisto Jerfi Aji kon la soprano Linet Shaul dyeron un konserto maraviyozo kon kantikas en italyano i en djudeo-espanyol.
Fotografiyas, felisitasyones i un kokteyl pastozo aparejado por la Matan-Baseter dyeron fin a este dia emportante.
Kero felisitar a todas las personas ke aparejaron este dia inolvidavle, i ke mos ayege el Dyo para kada anyo mijorado.
