Si, ay 19 anyos ke Yitzhak Rabin fue asasinado el kuatren dia del mez de Novembre 1994 por Yigal Amir, joven fanatiko del partido ultra nasyonalisto İsraelyano kontraryo a los akordos de Oslo konkluidos en el anyo 1993 kon los palestinyanos.
Al pareser, el asasino era un partizano absoluto de un “Grande Israel“ debasho la sola autoridad de un governo djudyo, sovre tyerras ke muy provablemente apartenian a muestros muy leshanos avuelos en un pasado antiguo, solusyon prekonizada por vyejos preseptos i tambyen tekstos eskritos a una epoka i en un konteksto sosyal ke no son oy adekuados a muestro tyempo.
Este akto morbido, no solo inhumano ma tambyen absurdo, fue paradoksalmente un krimen kontra el djudaizmo mizmo en una de sus preskripsyones las mas absolutas: “No mataras”-
19 anyos pasaron i ainda oy una kestyon obseda munchos de entre mozotros: “Eske ke este krimen fue un akto individual perpetrado en un momente de lokura?” O byen “una desizyon giada por fuersas obskuras superyores?”.
İze una chika bushkida a este sujeto, sin grande esperansa de topar kualkyer repuesta konvensyente. En efekto (komo previsto) no topi nada de muevo ni de realmente probante, salvo detalyos al sujeto del kamino sigido por Yitzhak Rabin en la esfera militarya komo tambien diplomatika i politika, lo ke penso kaji todos mis lektores ya konosen por seguro, ma del kual vos do en todo kavzo un kurto rezumen ke sera una chika reminisensya i partikularmente un akto de komemorasyon de muestra parte.
Segun lo ke mos ambezan los manuales de historya, Yitzhak Rabin fue konsekutivamente “un grande militaryo” komo tambyen “un muy grande hombre de Estado”. El partisipo a la gerra de 6 dias i alkanso al grado de “Jeneral”, ma unos kuantos anyos mas tadre el desido de meter fin a su karyera militarya i de entrar en el espasyo de la politika.
Al empesijo, en el anyo 1968, el devino ambasador Israelyano en los Estados Unidos, l en 1973 el fue elijido deputado del partido travayisto en la Kenesset.
Poko despues, el entro en el Governo İsraelyano debasho el titulo de Ministro del Lavoro i okupo el posto de dirijente de su partido politiko. Enfin, el 2 Junyo 1974 el suksedo a Golda Meir en kualidad de Primer Ministro.
El prinsipal epizodyo de su primer governo fue el selebre evento de Entebbe durante el kual fueron salvados los pasajeros de un aeroplan desviado por un grupo de palestinyanos. Portanto, el fue mas tadre ovligado de demisyonar de este posto superyor a la sigida de 2 motivos: A) El fakto de aver entregado 4 aeroplanes un dia de Shabat, lo ke pusho el grupo ultra relijyozo a travarse de la koalisyon governomental. B)El insidente de tener un chiko kuento en una banka amerikana, sin averlo deklarado ofisyalmente.
Durante su segundo mandato de Primer Ministro en 1992 debasho la prezidensya de Shimon Perez, Yitshak Rabin aktivo las relasyones kon el vezindado. La Autoridad Palestinyana fue rekonosida de parte de Israel i Yaser Arafat a su torno rekonosyo la egzistensya de Israel, renunsyando tambyen a kualkyer hostilidad o agresyon kontra el Estado Hebreo. De mezmo un tratado de Paz fue sinyado kon la Jordania, lakuala a su torno rekonosyo la egzistensya de İsrael.
Es la razon por la kuala, en djuntos kon Shimon Peres i Yaser Arafat, Yitshak Rabin resivyo el Premyo Nobel de la Paz en el anyo 1994 por su rolo aktivo en la sinyatura de los Akordos de Oslo. Esto, poko antes su muerte trajika i irrasyonal.
Aun no muy leshana de muestra epoka aktual, la situasyon era differente de la de oy, kon otras ideas, otras aspirasyones i puede ser un otro ideal. La mizma eksperyensa no se bive syempre integralmente de la mizma manera en momentos diferentes, portanto nada troko jeografikamente desde entonses, salvo las personas mas duras en sus egzijensyas.
