La Fuar Internasional de Beyos Artes en Turkiya

Tuve un grande plazer de vijitar el Sentro Lütfi Kırdar durante serka de 4 oras. Munchas grasias a la organizasion.

“El arte i el djugo es nesesario al ser umano para krear un espasio orozo.” Friedrich Schiller.

El presidente del konsilyo de la administrasion de la fuar desde 2006, Ali Güreli, tiene el buto de azer de ISTANBUL el sentro del arte kontemporaneo, despues de NEW-YORK, LONDRA...

“Tenemos komo objektivo de ser mondial... Savemos ke se deve de ser lokal, antes de ser mondial. A los invitados estranjeros, artistos, galerias.o konferansieros, keremos azer konoser el arte kontemporaneo Turko. Tambien krear una platforma mueva para artistos Turkos de la mueva jenerasion. Muestros artistos i galerias deven de ser presentes en payises estranjeros.”

Güreli, el vizionario, penso a dos novedades:

- Invitar 1000 koleksionarios a Istanbul.

- Azer plazer a los amantes de arte ke no tienen posibilita de pueder posedar las ovras. Tambien ambezar a el ke no save, ni no konose el arte, ni save kualo merkar.

Despues de la fuar, las ovras imprimadas i sinyadas en kuantidades limitadas, de artistos reputados, se van a pueder merkar en el Muzeo Istanbul Modern i Pera Müzesi.

Kuando en 2006 partisipi,k on mis tablos al olyo, en Contemporsary Istanbul, eramos en todo 49 galerias. Este anyo la fuar resive 108 galerias de la Evropa, de los Balkanes, ets., de 23 payises,

Mas de 500 artistos talentuozos se inspiraron i ekspozaron. Asemblaron elementos del impresionismo, manierismo, realismo, karikaturismo o kitch-ekspresionismo egzajerado, fotografias dramatikas de senas bividas, simples imajes, skulpturas, instalasiones o videos, ets.

Suetamos buena suerte i kontinuasion de Beyos Artes.