Antes 3-4 mezes, empesando a esta seriya, no teniya dinguna idea, asta ande iva kontinuar. Estambol No es sivdad ke se puede deskrivir en unas kuantas pajinas. Es komo un “Pozo sin Dip”. Malgrado ke, desde mi nasimiento bivo en Estambol, no konosko bien todos los distriktos de esta sivdad enkantadera. En estas pajinas, izimos un kurto viyaje a traverso los Siglos. Reelmente muy kurto. Ay muncho mas de eskrivir i kontar.
Otruna vez vamos a dar un torno en el sentro ke me engrandesi: Galata.. En un “interwiew” sovre muestra lingua, me aviyan demandado:“Para Coya Delevi ke sinyifika el Judeo-Espanyol?”.Me akodro aver respndido: “Los anyos 40, mis defuntos Nono, Nona i naturalmente Galata…
Galata syempre fue para mi sinonimo de nostaljiya, de rekuerdos de mis anyos de eskola primera, anyos de Gerra... Mi memorya enrejistro todo lo ke bivi, lo ke sinti, lo ke vide. El Galata de mi chikez…Konosiya todas sus kalejikas, uno por uno sus esnafes. Es enteresante, anyos i anyos no tuve la kuryozidad de konoser su Historia.
Galata i su inseparavle Torre ke dyo el nombre al distrikto: Kuledibi- La Kula… Un distrikto muy importante en la vida de una munchidumbre de djudios instalados aki durante siglos. A tal grado ke, syertos istoryanos, sosyologos lo deskrivyeron komo “Getto”. Es una realidad ke un grande shifro de djudios bivyo aki, komo fue el kavzo kon Hasköy, Balat, Kuzgundjuk ets..Ma, tengo dubyos sovre esta etiketa de “Getto”. Es ke era la kontinuasyon de una “Erensya Tradisyonal”?: “No mesklarsen a las otras komunidades, azer matrimonios mutuales entre mishpahas serkanas ets..?”
Syempre tuve la konviksyon ke los anyos de mi chikez me influensaron de munchas maneras. Por egzempyo, en los 1940-44, en mi kamino para la eskola, teniya la impresyon ke estava traversando istorikas kalejas. Fue esta konviksyon ke antes unos, kuantos anyos, despertyo finalmente mi kuryozidad, mi dezeo de bushkar, de konoser mas sovre el kuartyer.
Durante un anyo, a kada okazyon, me fui a Galata, a Karaköy, a La Kula, al Yazıcı Sokak de mi chikes i otras kalejas de mis rekuerdos. Las vijiti vezes i vezes, tomando fotos, demandando preguntas a derecha i syedra…Uno a uno estuve deskuvriendo syertos de los sekretos de Galata i ize un largo teksto ke se publiko en los N.os 91-92-93 de “El Amaneser”. Los tresladi tambien en turko para la Revista de muestra gazeta: “Şalom Dergi”.
Yo bivi en un kuartyer ande se sintiya bastante el nombre Kamondo. La kaleja enfrente la Torre, Galata Kulesi Sokak, abasha asta Bankalar. A la syedra vemos una fragua istorika ke fue un tyempo la Polisiya İngleza. Aktualmente es “Galata House”. Un poko mas abasho, era mi eskola primera. Aboltando a la Syedra, es Kart Çınar Sokak indo a las eskaleras de Kamondo.
Yo empleava otro itineraryo para irme a la eskola. Moravamos enfrente el Sankt Georg. En 3 puntos abashava a la partida superior de las Eskaleras de Kamondo (no las uzava) i tornando a la derecha saliya a Kart Çınar. Adjustare ke, pasando la Sankt Georg, a la syedra es la kaleja “Felek” ande oy se topa el “Sentro de Arte Schneidertempel”, Fue un tyempo una de las tres Sinagogas ke fondaron los Ashkenazim en Galata: “Beth a Knesset Tofre Begadim”. Kontinuando, vemos kon toda su esplendor, una “ex Rezidensya Kamondo. Despues devenido el ex.Felek Apt. Aktualmente “Galata Résidence Apart Hotel”. Tengo meldado ke las Eskaleras de Kamondo fueron konstruidas al nasimiento de Moise Camondo (1860-1935) para fasilitar el ir i vinir de la famiya.
Mi eskola era apegada a una ansyana fragua de tuvlas. Oy, En la plaketa eskrive: “Fraguado por los Genovezos en 1314”, komo “Sentro de Komercho Genovezo” i enfrente, la fragua del “Podesta”, “Konsilyo Administrativo Genovezo”. En kontinuasyon, en la oskura kalejika Eski Banka, otra ansyana fragua Genoveza, eskayida, ventanikas kon reshas de fyerro. Tuve la impresyon de toparme delantre una prezyon de la Era Media. Sorpreza!! En la tabela meldi: “Sen Piyer Han” i en otra: Aki nasyo André Chenier, el famozo poeta fransez”. Esta fragua i la pared de atras del Komplekso, “Eglisya St. Piyer–St.Paul” son situadas detras de la “Sinagoga İtalyana”, de Laleli Çeşme. Esta pared de la Eglisya fue fraguada kon pyedras de ruvinas Genovezas...
A Kontinuar...
