El syempre fue un pilar para la ekspansyon de muestra lingua etnika i es grasyas a sus esforsos personales ansi ke a sus direktivas muy lojikas ke munchos livros en este idioma fueron editados. / Klara Perahya
Keridos lektores
En el dalkavo ‘El Amaneser’ tuve la oportunidad de eskrivir un artikolo. Dospues del konsierto del violonisto Pinchas Zukerman ke tuvo lugar la semana pasada kije eskrivir un otro artikolo por el kual mi patrona Karen me disho ke puede topar lugar en El Amaneser. Ma, avia dicho a mis ermanas Klara i Şeli ke keria eskrivir un artikolo para el Shalom. No es un problema, ya puedo eskrivir otra koza. Si le plaze a Klara vo pensar lo ke puedo azer para eskrivir kada semana un artikolo para el Shalom.
De ke me vino ganas para eskrivir en djudesmo? Kreo ke es mas kolay de eskrivir siertas kozas ke no se puede dizir en turko. El es maz umoristiko ke el turko, puedeser porke para mozotros el fue una lingua para burlarmos.
Ma oy en diya estamos viendo ke realmente el Djudeo-Espanyol es una lingua muy emportante ke miles i miles de personas son kapaches de entender, avlar i meldar.
Ay 45 anyos ke lavoro en las ovras de muestra komunidad i kuando empesi a lavorar mos yamavan “los mansevos”. Kreo ke oy en diya la definisyon troko, ma mis amigos i yo keremos ke mos yaman syempre “los mansevos”.
La semana pasada muestro amigo Mois Gabay (el kual kreo ke es mansevo) eskrivyo en el Shalom un artikolo entitulado “Los Djudyos Turkanos se estan indo?”
La oja del Djudeo-Espanyol no es el lugar de kritikar los artikolos del Shalom. Ma en este artikolo kero felisitar este amigo mansevo, partikularmente por su koraje. El en primero disho ke los 37 por sien de los ke eskaparon el liseo, miembros de muestra komunidad, preferaron ir estudyar a otros paizes.
Keridos lektores oy en diya para los paryentes, del punto de vista ekonomiko, no es muy fasil de azer este esforeso. Penso ke la mas grande partida save ke azer estudyar un elevo al eksteryor es muy karo (kreo entre 12.000 i 50.000 dolares amerikanos -tuve el mazal de azer estudyar mi ija en New york en la Universidad de Parsons- no esto echando de la ishkembe).
Estos mansevos deke preferaron ir estudyar en otros paizes? Komo lo eskrivyo Mois, kreo ke kon el antisemitizmo ke estan biviendo los djudyos turkanos achakes de los eventos ke okuren en el Oriente –Medio o puede ser achakes de otras kozas, eyos estan demoralizados.
Los mansevos tienen mas munchos problemas porke keren un futuro fruktuozo. Es djusto ke la Turkiya no esta en un estado malo del punto de vista ekonomiko, ma siertas presyones politikas o praktikas estan deskorajando los mansevos de estudyar i bivir en muestro pais.
Munchas personas estan tristes kuando ven ke los no-musulmanos se estan indo a otros paizes, ma estas mizmas personas no dizen nada kuando siertos politikos o diaryos pronunsyan palavras o eskriven artikolos en desfavor de los djudios o de los no- muzulmanos.
El artikolo de Mois Gabay fue publikado en dos diaryos diferentes. El primer es el Milliyet – ke es realmente un diaryo muy emportante i dainda objektivo- el segundo: un diaryo ke paresia ser muy kontente ke los djudyos se estavan indo de la Turkiya. Esto es realmente un otro punto de antisemitismo i da razon a estos mansevos ke preferaron estudyar en otros paizes.
10 anyos dospues, kuando siertos de estos mansevos van a ganar premios mundiales, vamos meldar en los diaryos turkos “La Gloria de la Turkiya.”
Kerido Mois, tenemos menester de personas i jornalistos komo ti, ke tienen el koraje de ekspresar lo ke pensan sin atakar i sin ser agresivos.
