Meldi en la prensa franseza una petisyon entitolada “Nous, İsraéliens, militons pour la reconnaissance par l’Europe de l’Etat Palestinien” (mozotros İsraelyanos luchamos por el rekonosimyento de parte de la Evropa, del ‘Estado Palestinyano’) petisyon publikada por el Partido ‘Shalom Ahshav’ i sinyada por aproksimativamente 1000 intelektuales İsraelyanos entre los kualos grandes profesores universitaryos, ex- grandes funksyonaryos i militaryos, ansi ke selebres eskritores tal: Amos Oz, David Grossman, Avraham B. Yehoshua, ets…ets…
Esta eskrita ke posede un alto koefisyente de refleksyon i de humanizmo, tyene komo prinsipal objetivo de pushar los parlamentaryos Evropeos a rekonoser ‘un Estado Palestinyano al lado de Israel, en las fronteras de 1967’ afin de servir de baza a una kontinuasyon de las Negosyasyones de Paz ke fueron interrumpidas.
Para una mijor komprensyon, vos do debasho de estas linyas un kurto rezumen en Judeo-Espanyol de los paragrafos ke me paresen ser los mas importantes:
“La primera motivasyon de esta petisyon provyene de muestra voluntad de sinyifikar a la parte ponderada de los palestinyanos de no dezesperar de la evolusyon de una bushkida de paz i ansi de no emplear la violensa.
Los aktos terroristos perpetrados ay poko por kamikazes individuales i el nihilizmo gerreador del Hamas no puedran ser vensidos ke solo grasyas a una mueva esperansa afirmando ke ‘el retorno a muevas konversasyones’ puedra dar rezultados palpavles.
Delantre la inersia de los Estados Unidos, “una mueva inisyativa i una mueva retorika, todas las dos mas rezyas i mas klaras, vinyendo de Payizes Evropeos, son nesesaryas para un retorno a las negosyasyones de Paz.
La segunda motivasyon de esta petisyon es el espanto (no solo de parte de “Ahshav Shalom” ma tambyen de una grande fraksyon del puevlo İsraelyano) de la amenaza de la kreasyon de ’un grande Estado Bi-Nasyonal’ en direksyon delkual parese aver un arresvalamyento progresivo, i tambyen: el sentimyento ke “la solusyon de dos diferentes Estados” esta en peligro de dezaparisyon.
La inkapasidad de los Estados Unidos “de impedir el establesimyento de kolonias djudias sovre tyerras palestinyanas” aze kaji una realidad de la posibilidad de la kreasyon de un estado bi-nasyonal, lo ke sera una katastrofa para los israelyanos eyos mizmos komo tambyen para los Palestinyanos.
Ansi, para el futuro mizmo de la demokrasia, las nasyones demokratikas de Evropa deven entremetersen de una manera mas desiziva en el prosedimyento de la paz.
En İsrael por la primera vez, sitizanos de la “Syedra” komo de la “Derecha” manifestan sus deskorajamyento. Estas muevas bozes deklaran ke (en la situasyon prezente) la Paz no se establesera nunka entre mozotros i el Mundo Arabo.
En todo kavzo se puede afirmar ke “el fakto de renunsyar a la posibilidad de una rekonsilyasyon entre mozotros i los Palestinyanos’’sera una grande amenaza sovre la futura egzistensya del Estado Israelyano i es la razon por la kuala kale absolutamente luchar kontra esta fatalidad.” (fin de sitasyon)
Kualas seran las desizyones del muevo Governo İsraelyano ke sera elijido en dos o tres mezes? Kualos diferentes partidos azeran parte de este governo? esto depende del puevlo Israelyano el mizmo. Ke el Dyo Baruhu guie su voluntad en direksyon de la Paz, de la Vida i de un Esforso de entendimyento mutual. Amen!
