Aun ke eya tenia ainda munchas kozas a dezir i a ambezarmos, ma tal ke es el ultimo destino de toda kriansa humana, muestra amiga
‘Stella Alguadish’
serro por syempre sus ojos a un entorno echo de amor, kerensya i apresyasyon.
Despues de aver kumplido seryozos estudyos universitaryos de ‘Kimika’, Stella Alguadish fue durante largos anyos, profesora muy amada por sus elevas, en el liseo fransez ’Sainte Pulcherie’ de muestra sivdad i ansi munchas de muestras korelijyonaryas fueron formadas por eya en este ramo de la syensya.
Ke su alma repoze en paz i ke su nombre kede syempre en la memorya de los ke la konosyeron.
A su marido Jacques Alguadish, sus ijas Mona i Karen i sus inyetos, ansi ke a su ermana Mery i su kunyado Charles Danon, sus amigos i keridos: muestras sinseras kondolensas i la ekspresyon de muestra profunda simpatia en este momento de grande tristeza.
