La noche de 22 Desembre, en Neve Şalom, fiestimos HANUKA, simbolo de LA LUZ, kon grande entusiasmo.
Tuve la posibilita de konoser de serka la kerensioza balerina, Lili Barokas, ke solo konosia de reputasion.
Partajimos la mizma meza, mos alevantimos endjuntos para asender las ocho kandelas de la Hanukiya ke simbolizan El Todo Poderozo, la Tora. La Djustisia, la Piadad, la Santedad, la Kerensia, el Koraje. La ochena kandela representa el Shamash.
Asentadas lado kon lado, apresiimos kon Lili Barokas, el konserto famozo, el menu de la “Casa Catering”, i el salon yeno de yahides alegres, presentes por la selebrasion de muestra fiesta.
Muestra konversasion estuvo enteresante, la kestioni sovre su kariera de balet. Vos transmeto lo ke me konto i eskrivio en djudeo-espanyol:
“Tenia 6-7 anyos, el enturaje estava demandando a mi madre deke no me estava aziendo estudiar el balet. Mi madre bushko una profesora i topo en Tepebaşı, Estambol, en “La Union Française” Mme Dorad. Ma eya no kijo akseptarme por ke no teniya lugar ni tiempo. Mi madre reusho a azerle akseptar de verme. Kon grande emosion me apareji.
Mme Dorad metio muzika i me disho: ‘Bayla lo ke keres.’ Kuando me vido, le plazyi.
Merkimos kalsados, mayo, ets. El dia de la primera lision, mos fuimos a la Union Française. Tuvimos una negra sorpreza, una tristesa. Oyimos la muerte de Mme Dorad - yori muncho!
Mi madre no se deskorajo, bushko i topo Mme Arzumanof. Las mizmas senas se repetaron - no kijo aresivirme, ma kuando me vido baylar, se emosiono i disho: ‘No solo la aksepto komo eleva, ma kero ke venga kon mosotros a Ankara ande vamos a baylar por İSMET İNÖNÜ’, i ansina fue...”
La kerida Lili se akodro de otrun suvenir de su adultez:
“Tenia serka de 14 anyos. Akel anyo uvo un konkurso de balet universal i mi profesora Arzumanof mos preparo.
El diya del egzamen, avia grande emosion. Mis amigas estavan akompanyadas de sus parientes, yo estava sola, los miyos no se enteresaron.
La rekompansa era una kupa, un sertifikato i una nochada en Pera, en el sinema Saray.
Eskapo el egzamen, el juri se arekojo por desidar de los resultades i todos asperimos en la puerta kon grande anksiedad. Finalmente salieron i kijeron mandarmos a muestras kazas. Uvo una grande indinyasion, gritaron ke era un grande skandalo,. ke no partirian sin tomar los resultados. Asperimos de muevo, esta vez la puerta se avrio i meldaron el grupo de los chikos i yo solo komo primera...
Korri a kaza kon grande emosion i les konti ke fui la primera.
Me disheron: ‘Ya saviyamos ke tu ivas a ganar, es muy normal.’
Malorozamente no uvo ni kupa, ni sertifikato, nada... Ma yo era feliz de aver bivido akeyos diyas.
Esto es la primera vez ke lo konto, Esti...
Espero el anyo vinidero fiestar de muevo Hanuka kon la kompanyia de la famiya Saul.”
Kerida Lili, tuve muy grande plazer i yo te felisito por tu arte de saver komunikar i ambezar el balet a tus elevos fina oy, kon tu kara de riza, amabilita, pasion i amor.
Te kanto una kansion:
DEUX PETITS CHAUSSONS DE SATIN BLANC.
