Todas las 17 viktimas de los tres diferentes asaltos kriminales de la primera semana del anyo 2015 ya fueron enterradas, kada una segun el ritual de su relijyon o de la kreensa ke era la suya. Las del atake de la botika de produktos Glad Kosher fueron yevadas en Israel komo un retorno a la Tyerra Santa.
Ke todas las 17 repozen en paz, en el espasyo de un ‘İnfinito de serenidad i de akseptasyon del otro’.
Munchos de los ke toparon la muerte en uno de estos asaltos fueron inmensamente glorifikados por lo ke fue sus ovra de lakuala kedara syempre trasas despues sus pasaje en muestro falso mundo, otros de los ke muryeron (viktimas por ansi dezir anonimas) fueron enterrados por sus serkanos ke puede ser los nombraran en los anyos a venir.
En las varyas manifestasyones del 11/1/15 en Fransya, se glorifiko enormamente “los autores de las karikaturas de Charlie Hebdo” i por seguro se avlara de eyos en el futuro afin de mentener bivo el poder de la Prensa en su kritika sistematika de todo lo ke puede ser un obstakolo a la libertad de konsyensya i de ekspresyon de kada individuo, derecho esensyal ke figura en “la Deklarasyon de los Derechos del Ombre” promulgada en el anyo 1948.
Alhad el onze del mez koryente fue un djenero de akto unanimo de adhezyon a un mizmo dezeo de afirmar kada uno su libertad de pensamyento.
De otra parte, komparativamente al entusyazmo ke susitaron las karikaturas del profeta Mohamed, se meldo i se oyo avlar relativamente poko del ‘maraviyozo epizodyo de salvasyon de una partida de lo rehenes djudyos de Vincennes’ grasyas a la bravura de un chiko empyegado muzulmano ke espontaneamente (todo en syendo konsyente del risko ke esto konyevava para su propya persona si por desgrasya el djihadisto se rendia kuento de la koza) korto kon presura i muncha sangre fria el koryente de elektrisita de la kamareta yelada ande se konservava los produktos de karne, afin de azer de eya un refujyo para los ke al empesijo del atake se topavan afuera del kampo vizual del matador.
Es verdad ke Lassana Bathily el chiko empyegado del market Glad kosher sera rekompensado por el governo i obtyendra la nasyonalidad Franseza, ma es ke es bastante? es ke su akto de bravura no merese un sinyo de apresyasyon mas fuerte? partikularmente en este momento ande una grande parte del mundo Muzulmano se topa profundamente ferida en la suseptibilidad de su Kreensa Relijyoza i ande el ovligo de desferensyar el “individuo humanisto meritante” del “djihadisto kulpavle” devyene de mas a mas una nesesidad imperativa?
Uno de entre los ke apresyaron su djesto dize: “El es por seguro un heroe, ma antes de todo una kriansa humana ke kon simplisidad pudo kumplir un akto de solidaridad en favor de sus ermanos en humanidad. A mozotros de saludar este remarkavle djesto de bravura i de lusididad.”
De otra parte, el Papa François, al kual un gazetero demando su opinyom sovre las karikaturas de Charlie hebdo, respondyo ansi: “La libertad de ekspresyon es un derecho fundamental del ombre, ma ke deve ser empleado sin ofensar. No se puede insultar la fey de los otros, ni se puede azer de eya un sujeto de burla”. Personalmente me akodro las karikaturas ke, antes de la segunda gerra mundyal, viamos sovre varyas gazetas estranjeras mostrando invariavlemente un personaje djudyo, la nariz tal un gancho tuerto, las unyas de las manos largas i preteadas, simbolos de rapasidad i avarisya...i no me puedo olvidar la terrivle dolor ke entonses resentiya, komo una kuchiada salvajemente enfinkada en mi identidad djudia.
