Despues los tristes kavzos kriminales ke fueron perpetrados de parte de djihadistos nasidos i kresidos en el payis de René Descartes i Blaise Pascal, el Governo Franses pensa modifikar los programas de estudyo del kolejyo komo tambyen del liseo.
Los savyos de la antikuidad dizian ke todo lo ke akontese en el mundo repoza sovre una baza ambivalente i ke es a las personas eyas mizmas ‘ kriansas mortales ma pensantes’ ke inkumbe la libertad i ansi la responsabilidad de eskojer entre varyas alternativas, la ke es la mas adekuada al konteksto de kada problema...
Ansi, uvo durante desenias i desenias, de parte de varyos payizes evropeos, el desgrasyado ma tambyen paradoksalmente gloryozo periodo del kolonyalizmo sovre varyas tyerras Asiatikas i Afrikanas, kon un doble objetivo I rezultado: (primo) ‘dominar puevlos ke a sus pareser no avian evoluado al ritmo nesesaryo en el kampo del progreso syentifiko ni mizmo agrikolo’ i (segundo) ‘azerlos progresar en keryendo aprovecharsen del fruto de sus lavoro’, a la favor de la introduksyon de muevas konosensyas teknikas ke fueron para los otoktones un grande vektor de adelantamyento.
Grasyas a las eskolas ke fueron avyertas en un konsepto mas o menos laiko de parte de los okupantes ajenos i a metodos modernos de ensenyansa, uvo muevos temas sosyo- kulturales ke fueron estudyados, aklarando ansi meoyos asta entonses enfohados en una sola manera de pensar.
Fue lo ke fue el profito de la prezensya evropea en estos espasyos aziatikos i afrikanos, no se puede nyegar ke la kolonizasyon fue syempre un sujeto de grande amargura para los otoktones, feridos en sus dinyidad de sentirsen giados por fuersas ajenas ke azian de sus payis “un simple manadero de profito i enrikesimyento”.
Konsekuensa previzivle, uvo despues la liberasyon de varyos lugares ke gradualmenmte fueron afrankados de la autoridad evropea, un koryente inverso de egzodo ‘esta vez de los otoktones eyos mizmos’ en direksyon kada uno del payis de los ke fueron sus okupantes.
La adaptasyon para munchos de entre eyos fue superfisyal i kaji nunka kompleta, kon al fundo del korason un dezeo (puede ser inkonsyente al empesijo) de lntroduzir sus propyas valores en el sistema de vida del payis de akolyo, dezeo ke de dia en dia devyene mas imperyozo I mizmo sanginaryo.
Es ke ay un remedyo sosyal para meter fin a la aktual situasyon de insertidumbre ande se topa en este momento el mundo oksidental i tambyen varyos payizes eyos mizmos orientales?
Munchos grandes intelektuales pensan ke aktualmente, en el immedyato, ahuera una vijilansya perpetual de las fuersas de proteksyon governomentales i tambyen de kada individuo por si mizmo, ninguna otra mezura de seguridad no puede dar un rezultado pozitivo, ma ke en un relativamente kurto lapso de tyempo, a kondisyon de un muevo sistema de edukasyon de los ninyos ke empesara a ser aplikado no al nivel del Kolejyo o del Liseo, ma absolutamente al nivel primaryo, a la edad de 4 o 5 anyos (lo ke es el primer periodo de la vida ande el ninyo es en mizmo tyempo muy reseptivo i manko revoltado) rezultados probantes puedran espuntar.
Estos prestijyozos filozofos komo tambyen pedagogos mos dizen ke ay grande interes a ensenyar en las eskolas “el dover absoluto de respekto de kada uno en direksyon del otro ke si” antes de ambezar el alfabeto i las primeras reglas de matematika.
Aktualmente lo mas importante para el mundo en su totalidad, no es de salir viktoryozo de kualkyer batalya grasyas a armas sofistikadas, ma de parvenir poko a poko, gradualmente, a trokar la manera de pensar de los agresores ke no se kontentan de avlar o gritar i ke bushkan la okazyon de golpear asta muerte.”
