İki Gün, Bir Gece / Deux Jours, Une Nuit / Dos Dias, Una Noche
İki Gün, Bir Gece / Deux Jours, Une Nuit / Dos Dias, Una Noche
Los ermanos senaristos, Jean-Pierre i Luc Dardenne, realizaron un filmo ekstremamente importante de la lucha realista de la vida.
Una reushita remarkavle de la aktrisa Marion Cotillard,.ansi ke Fabrizio Rongione komo su espozo.
En Seraing, una sivdad industrial de Liège en Beljika, Sandra (Marion Cotillard) es una espoza i madre manseva, ke lavora en una chika fabrika de paneles solares. Eya sufre de depresion i se ve ovligado a tomar permision de su lavoro. Durante su ausensia, sus kolegas se dan kuento ke pueden azer el lavoro de Sandra, en lavorando un pokitiko mas oras, i la direksion propoza un bonus de € 1.000 a todo el personel, si estan de akordo para kitar Sandra de su lavoro. Kuando Sandra retorna a su lavoro, deskuvre ke su destino está en las manos de sus 16 kolegas, i eya tiene solo un fin de semana para vijitar kada una de eyas para persuadarlos a refuzar el bonus. Todos menesterezos, engrandesiendo sus famiyas kon difikultad material, no saven kualo azer.
Remarkamos la fidelita, komprension i perseverensia de su marido, ke pusha su espoza kerida, Sandra, de luchar para no peryer sus derechos. Ansi ke su ijos, la famiya se mete a konvenser Sandra kon difikultad para kontaktar su kolegas i azerlos akseptar de votar positivamente.
Kayıp Çocuk / The Captive
Un filmo de suspenso kanadiano dirijado por Atom Egoyan i ko-eskrito kon David Fraser. Los aktores son Ryan Reynolds, Scott Speedman, Rosario Dawson, Mireille Enos, Kevin Durand, i Alexia Fast.
Cassandra, 9 anyos, asperando su padre ke entro en una patiseria para merkar una turta, fue kidnapada de la komyoneta parkada en el bodre del kamino.
Los dedektivos i la polisia supsonan komo el suspekto principal, Matthew, el padre de Cassandra . Sin diguna notisia, 8 anyos se pasan de sufriensa para los parientes.
Mucize/ Miraklo
Veramente un miraklo realizado por el kantador/aktor/senaristo turko Mahsun Kırmızıgül.
Me impresiono realmente. Un filmo de no mankar de ver.
El filmo konta la istoria de un profesor de eskola, Mahir (Talat Bulut), ke es mandado, de una parte selestial del Egeo, a un chiko kazal prove i leshano de la Anatolia, ande las kreaturas esperan kon impasiensia de tener una eskola i resivir una edukasion. Ay vistas de la rejion de las montanyas del este de la Turkiya. I el djugo formidavle del aktor Mert Turak en el rolo de Aziz, un kazalino
Un filmo umanisto ke konta una istoria bivida. El poder del amor i la kerensia...
La performansa i realizasion perfekta merese palmas. Sin duda va ganar premios mundiales.
Rengrasiamos Kırmızıgül, asperando muevas realizasiones.
