Antes 8-10 anyos en uno de mis artikolos tengo afirmado ke la Memorya es el trionfo del umano sovre los anyos ke pasan i no tornan mas. Es tambien un dono presyozo i partikular ke permete a la persona de evokar el Pasado. Un dono ke, en syertas personas es mas desvelopado par raporto a otras.
En uno de mis tekstos presedentes del Şalom aviya eskrito sovre los anyos i la vejes. Oy vamos analizar el sujeto de un otro angolo. Komo lo savemos, los anyos, a niveles diferentes estan kontinuando sus lavoro de destruksyon, seya fizikamente, seya mentalmente.
Mentalmente… Esto es el “punto de vista “ del moabet de oy. Komo se dize en fransez, el “Point de Départ” de muestro sujeto. Por empesar, el lektor puede dizir “olvidar i no akodrar” son nosyones asemejantes. Egzakto, ma no syempre. Aki no estamos avlando de chikos olvidos pasajeros, insinyifikantes ke pueden arrivar i a los mansevos, a los chikos ets.. No kero dar munchos egzempyos. Estos olvidos pasajeros no son importantes si, el meoyo, la memorya de estos mansevos lavoran normalmente.
El famozo Prof. Dr.Osman Müftüoğlu dize: “Kon la edad ampesa Problemas konsernado la Memorya”. Keridos amigos, en fakto es de estos problemas ke kero avlar. Problemas ke a una syerta edad ampesan a ser muestro reselo i munchas vezes muestra Fobia.
Los anyos pasan deshando trasas de los eventos, rekuerdos de las personas, nombres, lugares, vizyones para akodrar i komemorar. Es djusto aki, ke no puedemos impedirmos de formular este dubyo:A KE GRADO MOS PUEDEMOS FİAR, AZER KONFİENSA A LA FİDELİDAD DE MUESTRA MEMORYA?”.
Es, lo ke mos akodramos syen por syen egzakto??. Yo no puedo responder a esta kestyon ma, puedo atorgar ke syempre en eskrivyendo mis rekuerdos de chikes, tuve dubyos i estuve demandando a mis primas mas grandes para konfirmar.
Antes un syerto tyempo tuve la oportunidad de avlar kon un espesyalisto, un psikologo i le pozi la kestyon de ariva i munchas otras. Aki su repuesta:
“La persona es la suma de sus rekuerdos, dulses i amargos. Kon el tyempo la memorya los elabora en syertos modos, en parte bazados a la la realidad i en parte inventados o egzajerados. İ ansi kada uno de mozotros semos el NARRATİVO PERSONAL de muestra vida. Los rekuerdos nesesitan testimonio komo otras personas, tekstos o fotografiyas. Para munchos el mas fuerte i siguro testimonio es arrebivir los rekuerdos kon la sigunda jenerasyon, mostrar a sus ijos sus raizes…”
Dishimos ke la buena Memorya es un fenomeno, i afilu un dono de los sielos. Syempre tuve la konviksyon ke todo modo de dono se puede desvelopar. Dunke le demandi al espesyalisto: “Es ke seriya posivle de desvelopar la memorya? Konservarla en buen estado i ke manera?”
“Mira” me respondyo el doktor. “Munchos de mis kolegos i yo tambien, konsideramos el meoyo komo un muskle i komo tal, kale lavorarlo para ke se desvelope.El metodo el mas konosido komo ya deven saverlo muncha djente, es azer egzersises del “selevro” (meoyo). Naturalmente, todos no posedan las kapasidades mental o konosensyas sufizyentes para esto. Alora pratikamos otros kaminos, otros metodos”.
Asigun el espesyalisto, malorozamente munchas personas no azen dingun esforso i van asta dizir: Ke me va kansar el meoyo en baldes!!”.Es esta haraganud del meoyo o mas egzaktamente del benadam ke apareja en grande mezura los dezrepozoz mental komo el “Alzheimer” por egzempyo. Keridos amigos, es egzaktamente de este dezrepozo ke se trata kuando, en el presipyo dishe muestros reselos, muestra fobia…
A kontinuar...
