Keridos Lektores, Ya estaj imajinando lo ke es el sonyo…
Siguramente ke oy va eskrivir el desbarkamyento (çıkarma) a Edirne kon mil personas.
En el anyo 1492, kuando los djudyos fueron arrondjados de
la Espanya; kaji 20.000 djudyos vinyeron a Edirne i se enstalaron a esta sivdad fina los anyos 1956-1960.
Malorosamente a kavza de problemas politikas; todos fueron ovligados de deshar esta sivdad kerida, ande teniyan todos sus rekuerdos.
İ la sinagoga famoza, se desho al sol i al ayre. Pasando los anyos esta sinagoga maraviyoza ampeso a derrokarse i se estruyo tanto ke le kedo solamente uno de los Shadayes en el fronte del eksteryor (dış cephe).
Antes sej syete anyos kuando me fui por la primera vez a Edirne kon un grupo; me se apreto el korason de ver el hal de esta ovra istorika. Antes sinko anyos; el ‘Direktor Jeneral de las Fondasyones’ (Vakıflar Genel Müdürü) paso en kontakto kon muestra komunitad para konstruir esta sinagoga presyoza para mozotros, i las personas otorizadas de muestra komunitad kon los prezidentes ampesaron a lavorar i kitar esta fragua ekstraordinarya en medyo.
Enfin tomo muncho tyempo ma; la avyertura de este
‘Kal A Kadoş’ fue una lokura, un dia inolvidavle, un dia istoriko ke la persona puede bivir una vez en su vida.
El 26.03.2015 djugeves demanyana komo era una de las responsavles de un otobus, salimos a las sinko de demanyana kon mi marido para iyir a risivir las 40 personas ke estavan eskritas en el otobüs muestro, i para duzudear los kolis de dezayuno, komer de midi…
İ komo de organizasyon! Era koza de ver. Todo kamino komo una ora. Enfin; sej otobuses demanyana a las sej, i katorze otobuses a las ocho ayegaron a Edirne kon un eskort delantre i uno de detras kon un ambulans komo kortej de novya.
A la entrada de la sivdad tabelas eskritas:
“Keridos Vizinos, Vinido Bueno i Klaro a Muestra Sivdad”.
Todos los kaminos i las kalejas vaziyas, entornadas de una sekuritad formidavle i las baryeres yenos de polisiyas.
Mos distribuaron una takya para los ombres, i una esharpa ande estava emprimado la fotografiya del kal.
Entrimos kon grande entuzyasmo,
Komo de maraviya! Komo de emosyon!.....
Las mujeres ariva, los ombres abasho, todos kon las takyas i las esharpas, una vista empresyonante, todos travando fotos, los ombres kon talletes i tefilimes.
Veramente keridos lektores; esta vista maraviyoza no se puede dar a entender kon byervos. Kale bivirla en su lugar mizmo. La grande sorpreza fue; ke el Hazan ke izo la orasyon de alkavo antes 46 anyos kuando este kal se serro; vino de Israel i izo la primera orasyon aki, en la sinagoga…
La orasyon de la Tefilla se izo de la parte de los mansevos.
Las orasyones fueron akompanyadas por todos los ombres ke asistyeron a esta fyesta.
A la fin de las orasyones, mizmo las mujeres kantaron en gritando, yorando “Mizmor Le David”, kon una emosyon ineksplikavle.
A la salida mil personas ayegimos al simeteryo para echar ashkavas a los ke estan enterrados aya.
A las doz vinimos al kal de muevo, la djentorya ni lugar de asentar…
Munchos presidentes i reprezantantes de las komunitades djudiyas de la Amerika, Israel, Azerbeycan, Rusiya, Gürcistan, Bulgariya, Romanya, İtalya fueron envitados por la parte del ‘Ministeryo de Relasyones Eksteryores’ kon la ‘Direksyon Jeneral de Fondasyones’.
A parte; los reprezantantes de las ambasadas (elçilik) fueron envitados por Ankara.
Kuando entro el Vice Primer Ministro (Başbakan yardımcısı) todos lo aplodisaron.
El koro de Maftirim, i de los ijikos de la eskola djudiya ermozearon el dia kon sus bozes maraviyozas.
Despues de unas kuantas avlas, el presidente de muestra komunitad İshak İbrahimzadeh izo una avla korajoza en remersyando a todos ke dyeron un esforso spesyal para la konstruksyon de esta sinagoga grandiyoza.
La seremoniya de ‘Ahnasat Sefer-Tora’ fue muy emosyonante, kon kantikas i spesyalamente mil personas kantando ‘Heveynu Shalom’ de una boka.
La Sefer-Tora entro en la mano del Rav Nafi Haleva i kuatro mansevikos detenyendo la ‘HUPA’.
Delantre la Hupa; un ijiko de mueve anyos kon un Shofar largo, i un montante de ombres kantando kon los shofares mos emosyono tanto ke ampesimos a yorar.
La seremoniya se termino a las kuatro, despues se envito a un kokteyl preparado por la Casa Catering. Kuando los ambasadores i reprezantantes se fueron kedimos entre mozotros muy kontentes del dia reushido, avlando i iyendo…
A la fin izimos las orasyones minha i arvit.
Entonses una muzika folklorika, ampesimos a baylar, mujeres i ombres azyendo ‘Hora’ kon pasyon.
Los partisipantes se metyeron al kamino kon la esperansa ke van a vinir aki para azer orasyones i mostrar la solidaritad de los djudyos.
Antes de terminar kero remersyar al Presidente
İshak İbrahimzadeh kon su ekipa i a todo ke lavoraron para esta organizasyon perfekta; ke mos izyeron bivir este dia inolvidavle ke va pasar a la istorya.
