Muy Keridos Korelijionarios,
Antes de todo kero rengrasiar de todo mi korason a mis korelijionarios ke me vijitaron o ke me komunikaron sus mijores deseos de sanedad mientres ke estuve enfermo. Este grasioso kudyo fue el kavzo el mas emportante de restablaserme. Espero de estar entre vozotros en tiempo serkano donde de ahora siento la emosion.
Malgrado mi enfermedad no me absteni de seguir atentamente el periodo i los aparejos de reinaugurasion de la “La Grande Sinagoga de Edirne” ke malhorozamente no pude tomar parte en esta seremonia. Vos kero asegurar ke moralmente estuve entre vozotros kon todo mi korason.
Todo en rengrasiando a las otoridades ke nos dyeron la oportunidad de alkansar a este evenemento bien emportante, agradesko a los muy estimables dirijentes de nuestra komunidad i a nuestros korelijionarios ke partisiparon a la seremonia i mostraron una solidaridad ekselente. Me glorifiko de ser el Gran Rabino de esta kolektividad perfekta.
Keridos Ermanos.
Este anyo selebramos el “Pesah” ke es la fiesta de la libertad i de la primavera juntos kon “Şabat” bendicho.
Es ansi ke unifikamos en nuestras orasiones i selebrasiones el evento de “Maase Bereşit/Evento de Kreasion” djuntos kon el evento de “Yetsiyat Mitsrayim/Salidura de Ayifto”.
Ya lo savemos muy bien ke el “Yetsiyat Mitsrayim” es nuestro pasaje del “Meavdut Leherut Umişibud Ligula/Del esklavaje a la Libertad i del Kativerio a la Salvasion” por todos nozotros.
Tanbien ya es savido ke el “Şabat” es el sentro de la disiplina de nuestra Santa Tora regalada a nuestros abuelos dospues de 50 diyas de esta libertad.
De este punto de vista pudemos dizir sin ningun dubyo ke la libertad i la disiplina son los dos elementos ke kompletan i fortifikan el uno al otro en todo modo de senso.
Kon este entendimyento agradesemos a nuestro Dyo ke nos ayego a fiestar estas dos selebrasiones cuntos nuestros keridos i serkanos al rededeor de el pranso de “Seder”.
“Baruh Şeeheyanu Vekiyemanu Veigiyanu Lazeman Azae”
Keridos Ermanos.
El buto prensipal de la “Agada de Pesah” ke resitamos en el pranso de “Seder” es revitalizar una otra ves nuestra konsensya sovre el evenemento de “Yetsiyat Mitsrayim”. Todo en dandonos la oportunidad de edukar nuestos ninyos i jovenes en esta okazion. Es por esto ke la “Agada” deve ser bien komentada, bien eksplikada i bien entedida.
No ay de neglijar ke nuestra union i egzistensia depende de transmeter nuestra ley i kultura a las jenerasiones vinideras.
No ay dubyo ke el apoyar i el sostener seya moralmente o seya materialmente a los dirijentes de nuestra komunidad ke siempre dan esforsos presiozos por nuestra komunidad, i ayudarles kon vuestras ideas kreativas tendra una alta valor. Espero ke nuestros ermanos no mankaran de tomar parte en los esforsos komunales.
Siendo yeno de estos pensamientos i sintimientos vos bendigo a todos vozotros kon todas las bendisiones de la Santa Tora i vos auguro un buen Pesah kon todos vuestros keridos i serkanos dentro union, salud, pas i prosperidad.
Hag Pesah Sameah
Rav İsak HALEVA
Gran Rabino
