El diaryo elektroniko “Le Monde” datado del 3 del mez koryente mos informa ke despues de dodje anyos de tratos muy problematikos sovre la kestyon del Nuklear Iranyano, las negosyasyones de los Estados Unidos, la Fransya i otros payizes Evropeos kon Teheran ayegaron a un punto relativamente konkreto.
A la kestyon formulada por el mizmo diaryo fransez ‘kualas son las eventualidades ke se puede asperar de este empesijo de konkluzyon?’, un grande analisto de relasyones internasyonales i ansyano embashador de Fransya a Teheran respondyo: ‘El akordo penivlemente konkluido djueves de la semana pasada 2 April 2015 en Lausanne’ es la ultima etapa del litijyo de kaji 12 anyos sovre el nuklear İranyano, problema ke data del empesijo del siglo prezente, poko despues la desfecha i la egzekusyon de Sadam Hüsein en Irak por las fuersas Amerikanas”.
Entonses, despues la invazyon del payis vezino de parte de armadas Amerikanas i otras, el Iran inkyeto de ser tambyen okupado por militares oksidentales, empeso a pensar a la posivilidad de tener debasho la mano una fuersa atomika ke sera una defensa kontra kualkyer okupasyon”.
De otra parte, un otro komentador politiko disho a este sujeto, ke despues kaji 10 anyos de ‘kara a kara’ esteril entre el mundo oksidental i el Iran, es grasyas a la eleksyon en el anyo 2013 del Prezidente Hassan Rohani muncho mas moderado i sin ninguna semejansa kon su predesesor, ke la situasyon pudo ser desblokada.
El adjunto ke ‘en realidad en esta konkluzyon no uvo ni pedrientes ni ganadores’. Mizmo si la ekonomia İranyana se topo terrivlemente kastigada durante la ultima desenia, esto no ralentiso el desvelopamyento de su programa nuklear. El shifro de Sentrifugadores fue multiplikado por syen entre el anyo 2003 i el dia de oy.
El kompromiso konkluido djueves pasado 2 /4/2015 entre el Iran de Hassan Rohani i los delegados oksidentales es una etapa krusyal en direksyon de una solusyon del litijyo, lo ke puedra tener reperkusyones favoravles en el Oriente Medyo.
Komo se asperava byen, Benyamin Netanyahu deklaro kaji immedyatamente, ke se trata de un akordo ke amenaza la Seguridad de İsrael....I el demanda aktualmente kel Iran rekonoska ofisyalmente la egzistensya del Estado Israelyano en el Oriente-Medyo.”
La prensa İsraelyana esta mas o menos divizida sovre el akordo en kestyon; los avizos son munchas vezes diferentes segun las opinyones i konviksyones politikas de los varyos diaryos. Sin sorpreza se ve ke ‘las gazetas partizanas del koryente politiko konservador’ sigen la mizma manera de pensar kel Governo; eyas son relativamente inkyetas despues esta primera etapa pozitiva a lakuala ayego el dialogo sovre la kestyon del desvelopamyento nuklear Iranyano.
Para el “Jerusalem Post” partizano de una politika del ‘Sentro de la Derecha’,se trata de “una viktorya del Iran”. En la mizma gazete Melanie Philips disho mizmo ke ‘la Administrasyon Obama echo al syerkol kada una de sus ‘linyas koloradas’ i ansi kapitulo sovre el terrorizmo nuklear afin de obtener un akordo, kual ke sea...
Por kontra el Haaretz eskrive ke “este primer akordo no es tan malo”.
De su parte, en el sityo “The Times of Israel”, el espesyalisto militar Mitch Ginsburg se esforsa de topar razones de konservar un poko de esperansa i deklara ; ‘mizmo si los dirijentes Iranyanos van afishar sus viktorya kon bandyeras i festividades, İsrael deve azer 3 importantes esforsos:’ser İntelijente’, ‘mostrarse diplomato’ i ‘bushkarse aliados en aserkandose de las grandes potensyas Sunites’.
Syempre segun ‘the Times of İsrael’: En repuesta a la reaksyon de Benyamin Netanyahu, dia de Alhad la noche en una entrevista akordada a Thomas L. Friedman djornalisto del diaryo amerikano “The New York Times”, el Prezidente Barack Obama deklaro ke “el akordo kon el Iran’ no reprezenta ninguna amenaza facha al potensyal militaryo İsraelyano.
El afirmo tambyen ke mizmo si Teheran no respekta los parametros del Akordo, la kapasidad de disuasyon nuklear de los aliados oksidentales i sus superyoridad militarya kedaran syempre rezyas i fermas,
Keridos lektores, komo ya lo savemos todos no puedra nunka egzistir una verdadera Paz tanto ke avra este terrivle aborresimyento entre las nasyones i partikularmente entre las relijyones . Ansi komo syempre mos kontentaremos de rogar ke el Dyo Baruhu pushe los pasos de ‘la Humanidad en su totalidad’ en direksyon de una kerensya mutual. Amen!
Ma es ke esto es posivle? Es ke es realizavle?
