En el kaos ande el mundo parese undirse en este momento, la dimensyon mizma de los faktos trespasa munchas vezes muestra kapasidad de entendimyento i de esta manera mos topamos delantre una realidad ambivalente ande elementos kontraryos se nyegan los unos los otros.
Ansi munchos prinsipyos ke al orijen paresian ser imperativos pedrieron si no totalmente ma a lo menos parsyelmente, sus vigor absoluta de persuasyon i kon grande frekuensa se despertan en mozotros un djenero de interrogasyon i de egzamen de konsyensya ke mos pushan a bushkar las diferentes fachas de un mizo presepto.
Es puede ser la razon por la kuala (despues kaji dos o tres semanas ke se produzyo el terrivle krash del Airbus A320 de la kompanyia low-cost “Germanwings”) la prensa esta ainda yena de preguntas sovre el grado de seguridad o de peligro ke los viyajes aeryanos komportan, i tambyen, (lo ke es lo mas importante) sovre el ovligo de obedyensa al prinsipyo del ‘sekreto absokuto’ al kual son sometidos los medikos.
“Eske se puede meter en perikolo la vida de 150 personas en el solo objetivo de no traisar los prinsipyos de baza del sekreto medikal en kestyon, todo en savyendo ke syempre ay una probabilidad kel aeroplano sea a un kualkyer momento dirijido por un segundo piloto kargado de problemas psishikos i sovre todos suisidaryos?
İnevitavlemente, una mueva pregunta mos vyene al tino: “Eske las leyes sovre este mizmo sekreto medikal ke fueron konsolidadas en el anyo 1994 pueden ainda, oy en dia, kedar validas en el konteksto sosyo-kultural del mundo aktual?
Ay de esto unos kuantos dias, un djornalisto formulo mizmo la kestyon sigyente de la kuala vos transmeto la traduksyon en su integralidad “Es ke se puede konsiderar el sekreto medikal komo realmente un elemento ethiko, kuando aktualmente se avla de mas a mas de un ovligo de transparensya?”
Ningun prinsipyo puede tener a el solo una valor absoluta, su valor es syempre relativa, atada a faktores diferentes ke la konfirman o byen la destruyen. No mos olvidaremos ke en la mas parte de kavzos ay una interdependensya entre los varyos elementos de muestras desizyones i todos savemos ke aun muestra sinsera voluntad de kumplir aktos pozitivos, el rezultado obtenido no es syempre kompletamente konforme a muestra esperansa.
Una ultima kestyon: “Es ke el ‘Ser humano’, kriansa pensantes i sensivle, sera syempre sotomedido a la ambivalensya de kada koza, kon simultaneamente una mizma suma de byen i de mal mesklados el uno al otro?”
