Munchos lektores se akodraran por seguro las ermozas palavras pronunsyadas, ay de esto unas kuantas semanas, por el primer Ministro fransez Manuel Valls: “Sin los djudyos la Fransya no seria lo ke es“. Palavras al pareser sinseras ke mos prokuraron a kaji todos, desendyentes de Moshe Rabenu, un sentimyento de verdadero orgolyo i ke despertaron en mi el dezeo de dar de vez en kuando (de una manera irregolar) unos kuantos detalyos sovre los ke fueron “elementes pozitivos en la evolusyon kultural de la Fransya”, los unos nasidos i kresidos en el payis mizmo, los otros migrantes de lugares envezes leshanos de los kualos eyos fueron rondjados.
Entre munchos otros nombres djudyos ke vizivlemente ayudaron a valorizar la sivilizasyon Evropea, eskoji sin ezitasyon el ke parese ser el manko konosido: “Benny Levy, alias Pierre Victor.”
Ken es Benny Levy? El nasyo en Ayifto al seno de una de las famiyas djudias de este Payis, ma a la edad de 11 anyos en 1957, a la sigida de la kriza del Kanal de Suez, su famiya se topo en el ovligo de ir instalarse en Beljika ande el adolesente fue inskrito en un Liseo Franses antes de ir unos kuantos anyos mas tadre a Paris ande el fue akseptado en la selebre ‘Ecole Normal’, lo ke le permetyo de enkontrar i de tener mas tadre komo profesores varyos filozofos marxsistos i entre eyos Louis Althusser ke tuvo sovre el una grande influensa.
Ansi, poko despues, debasho el sovrenombre ‘Pierre Victor’, Benny Levy sin mizmo aver obtenido la nasyonalidad franseza, se inskrivyo en la “Unyon de la manseves communista Marxista-Leninista” grupo del kual el devino uno de los myembros los mas aktivos i mas tadre (despues los evenementos de Mayo 1968 en Fransya) el fue dirijente de “la Syedra Proletaryana” chiko partido absolutamente Maoisto...
Komo algunos de muestros lektores mas aedados ke 60 anyos se akodraran puede ser, dos anyos despues del solevantamyento de la manseves franseza en 1968, en el anyo 1970 el partido de la Syedra Proletaryana fue disolvido i prohibido.
Entonses Benny Levy ke era syempre konsiderado komo apatrido, se sintyo ovligado de kontinuar a lavorar de una manera klandestina, debasho el sovrenombre ‘Pierre Victor’ ke mas tadre, en el anyo 2002 el mizmo konsidero ser monstruozo.
Munchos de los ke lo konosyeron de serka deklaran ke Benny Levy era un orador prestijyozo ke puedia avlar de kavesa una ora entera sin hezitasyon, de una manera ke paresia tener el poder hipnotiko de render fasil a entender kualkyer sujeto prezentado a los oditores. Ansi el okupo varyos postos universitaryos en grandes fakultades Fransezas espesyalizadas en la ensenyansa de la filozofia.
En los anyos 1970, el tuvo la okazyon de enkontrar Jean Paul Sartre, fundador del “egzistensyalizmo atheisto”. Al pareser uvo un koryente de simpatia immedyata entre los dos. Era una epoka ande la salud del grande filozofo fransez no se topava en buen estado; a la sigida de un golpe de gota bastante agudo, el avia pedrido su vigor fizika i su ojos no puedian mas ver klaramente.
Es puede ser una de las razones por las kualas en el anyo 1973, Benny Levy devino el Sekretaryo partikolar de Sartre i lo kedo asta su muerte. El le azia la lektura a boz alta de varyos tekstos sovre los kualos eyos dos tenian largos kambyos de ideas ke los pushavan a aprofundir ainda mas kada thema estudyado.
Es tambyen a esta mizma epoka ke Benny Levy pudo obtener la nasyonalidad franseza grasyas djustamente a la intervensyon de Sartre en 1978, anyo durante el kual el ke en el pasado era dirijente maoisto de la “Syedra Proletaryana Franseza” tuvo igualmente la oportunidad de deskuvrir la filozofia de Emmanuel Levinas.
La lektura aprofundida de los tekstos del grande filozofo djudyo lituanyano ke inkulko a munchos de sus dishiplos o simples lektores “la importansa del respekto por la kara del otro” avyo delantre del ansyano maoisto un muevo espasyo de pensamyento ke lo pusho a estudyar profundamente la Tora, el Talmud, la Kabala i el Dekalogo, los kualos tambyen avyeron para el ‘horizontes deskonosidos’.
De mezmo, durante los tres ultimos anyos de vida de Jean Paule Sartre, a la sigida syempre de interkambyos de ideas ke el tenia kon su sekretaryo, algunas de sus opinyones anteryores pyedreron sus intensidad. El selebre filozofo revino sovre su ovra anteryor kon una mirada diferente i ‘el ke toda su vida afirmo kon fuersa el atheizmo’ empeso a avlar del Djudaizmo komo de una refleksyon dinya de ser estudyada, lo ke provoko la revolta de Simone de Beauvoir i de munchos otros de sus amigos, todos pensadores atheistos konvensidos, los kualos akuzaron Benny Levy de aver abuzado de la frajilidad de una persona aedada”...
Revinyendo a Benny Levy ke (tal ke fue dicho mas antes) avia tenido komo una buelta de meoyo irrepresivle debasho la influensa de las ideas de Levinas, el ke era un atheisto absoluto devino un praktikante absoluto de todas las mizvot.
Entre sus ovras las mas konosidas se topan: ‘Le messianisme juif moderne/(el mesyanizmo djudyo moderno)”, “Etre Juif/ (Ser djudyo)” ovra ke fue publikada despues su muerte, “L’Espoir maintenant /la esperansa agora” seleksyon de sus dialogos kon Sartre, ets…ets…
Es en el anyo 1997 ke el emigro en Israel i se instalo en Yerushalayim ande, en kolaborasyon kon el akademisyano fransez ‘Alain Finkielkraut’ i el filozofo ‘Bernard Henri Levy’, Benny Levy parvino a krear el ‘İnstituto de Estudyos Levinasyanos’ delkual el asumo la direksyon asta su muerte en 2003.
Su pasaje en este mundo fue emblematiko: de Moshe a Mao i de Mao a Moshe.
