Aun ke eya pyedro la vida a una edad byen avansada, Louise Bahar Nebabiş desha en la Kommunidad Djudia de Estambol el rekuerdo de de una grande Dama muy luzya de kara i moralmente muy presyoza, sensivle a la sufriensa de sus semblavles i syempre pronta a ayudar espontaneamente kualkyer persona en estado de desmamparo. Eya era konvensida de la voluntad de Dyo en kada uno de muestros aktos i savia traduzir sus sentimyentos relijyozos kon aksyones konkretas de ayudo a los ke se topavan en su entorno.
La primera grande aksyon de solidaridad humana de Louise Bahar Nebabiş fue kumplida en Paris ande eya paso su ninyes al seno de su famiya djudia de Turkia ke se avia establesido en Fransya sin por esto renunsyar a la nasyonalidad Turka.
Tengo personalmente eskrito a este sujeto antes munchos anyos, a la okazyon de una entrevista ke tuve kon Louise Behar, durante la kuala eya me avia mostrado un dokumento ke konfirmava la verasidad de lo ke me kontava. I oy, unos kuantos dias despues su muerte, yo syento el dover de relatar de muevo el korajozo lavoro de salvamyento ke eya avia kumplido en Paris durante los anyos de la okupasyon nazi.
Komo munchos de muestros lektores aedados se akodraran, en los anyos obskuros de la Segunda Gerra Mundyal, despues la desfecha de las armadas fransezas delantre las fuersas militaryas Almanas i la invazyon de Paris por los Nazis ke tenian komo objetivo prinsipal de erradikar kompletamente la prezensya djudia en Evropa, i ke en este eskopo formularon la egzijensya ke todos los djudyos metan sovre sus vestimyenta, al nivel de la pechadura, una estrea en estofa amaria, sinyo distinktivo ke eyos eran de rasa inferyor.
Delantre esta situasyon, la Turkia ke avia preferado guadrar la notralidad en el konflikto Germano/ Franses, demando a las autoridades almanas de no tokar a kualkyer persona de nasyonalidad Turka i de no egzijir ninguna marka distinktiva de sus orijen o relijyon.
Louise Bahar ke a esta epoka bivia en Paris, era una muy ermoza manseva de 20 anyos ke azia parte de una asosyasyon byen entendido klandestina, la kuala se okupava de los ninyos ke deshavan detras de eyos los primeros djudyos ke fueron mandados a los kampos de konsentrasyon para mas tadre ser eksterminados.
En este eskopo, la dicha asosyasyon se okupava de topar famiyas kristyanas ekonomikamente nesesitozas ke moravan en chikos kazales poko puevlados en la periferia Parizyana, personas vizivlemente honestas a las kualas eya demandava de okuparsen de lo ninyos kontra una ‘bastante grande suma de moneda’ a la kondisyon de nunka mirar de trokar sus relijyon de nasimyento.
En la realizasyon de este programa, la mas grande difikultad era de yevar kada uno de estos futuros guerfanos asta la famiya ke le era destinada sin despertar la atensyon de los okupantes almanes.Louise ke grasyas a su pasaporto Turko no era ovligada de yevar la ‘estrea amaria’ aksepto de kargarse de esta funksyon todo en konosyendo el peligro ke esto komportava, i eya la kumplio asta la data de su retorno en Turkia kon toda su famiya, la kuala una vez en Estambol se instalo en Kuskuncuk ande eya enkontro Viktor Bahar su futuro marido.
Konsernando la segunda partida de la vida de Louise, munchos de entre mozotros la konosen: Endjunto kon su marido, eyos dos partisiparon anyos i anyos, de una manera muy intensiva, a la aktividad del Azilyo para personas aedadas de Hasköy, todo en syendo una madre i un padre yenos de kudyo i kerensya por sus ija i ijo a los kualos todos los ke eskriven en esta pajina prezentan sus sinseras kondolensas.
Ke eyos dos, Louise i Viktor, repozen en paz en el espasyo ke por seguro les fue rezervado en Ganeden i ke sus pasaje en muestro mundo kede syempre eskrito kon letras luminozas en la memorya de los ke los konosyeron. Amen!
