Despues del dezayuno de demanyana en el otel, salimos por iyir a vijitar la kaza de un poeto famozo de la literatura i ke se esta utilizando oy en dia komo muzeo.
Cahit Sıtkı Tarancı es un poeto emportante de la poezia turka. El nasyo en esta kaza ke es una de los egzempyos maraviyozos de la arkitektura sivil de Diyarbakır.
Tyene 14 kamaretas, mupak, un numero i un kiler.
Se esta ekspozando aki; las lettras eskritas por su mano, sus efektos personal, sus livros i las fotografiyas de famiya.
Kontinuimos kon una meskita ke es la mas vyeja de la istorya islamika Ulu Camii. Esta meskita es konstruizada en forma rektangular i kon munchas kolonas (sütun).
Las Murayas de Diyarbakır (surlar) tyenen una istorya de 9.000 anyos. Komo altor i grandor estas murayas sonprimeros (birinci) en el mundo; de largor son el sigundo en el mundo despues de la grande muraya de China (Çin Seddi).
‘El Ponte de Dyes Ojos’ (10 Gözlü Köprü) construizado sovre el rio ‘Dicle’ kon las guertas produktivas (verimli) estavan enteresantes.
Despues ke komimos por midi, el grupo entero se arekojyo en el otobüs para iyir a Şanlıurfa.
La primera istasyon en Urfa fue Harran, la meskita la mas vyeja Harran Ulu Camii; ke se fondyo en la Turkiya en el tyempo del İslamismo; la Universitad de Harran; ke es emportante porke se fondyo la primera eskola relijyoza islamika (medrese) en la Anatolya.
Es uno de los primeros sentros de la sensya (bilim) en el mundo.
Lo ke es emportante i enteresante de ver en Harran; son las kazas konikas kon domos (konik kubbeli evler). Las kazas tyenen sinko metros de altor aryento; i son echas kon kuarenta tuvlas (tuğla) una allado de la otra.
Las kazas de Harran tyenen una armoniya kon el klima de la rejyon ke es; fresko en enverano i kayente en invyerno. La vijita de ‘Göbekli Tepe’ fue muy spesyal.
Göbekli Tepe es el templo (tapınak) el mas grande i el mas vyejo ke se save en la istorya. 7500 anyos mas vyejo de los Piramides de Ejipto.
En esta rejyon se fikso (tespit etmek) 20 templos, ma solamente sej templos salyo en medyo por oras.
En las paredes de la caverna (mağara); se puede ver figuras de animales, i las pyedras brodadas kon las figuras de renar (tilki), toro (boğa), kulevra, leon i otros…
Prof. Dr. Klaus Schmidt tomo la permisyon de kavakar (kazımak) aki, para pueder topar rikezas istorikas.
Del anyo 1995 a delantre ampeso este lavoro emportante.
Malorosamente el anyo pasado el arkeolog Klaus Schmidt serro los ojos para syempre. (z.l.)
Urfa es una de las sivdades de las mas vyejas del mundo.
Munchos profetas (peygamber) bivyeron en esta sivdad yena de istorya.
Los lagos ‘Halil Rahman Gölü’ kon ‘Balıklı Göl’ estavan enteresantes. Balıklı Göl yeno de peshkados grandes, ke estavan komyendo las migas ke estavan echando las personas.
Estos peshkados son konsiderados komo sakros (kutsal) por el puevlo, por esta razon los estan protejando i no los estan komyendo.
Vijitimos la caverna ande nasyo Avram Avinu, la torre (kale) de Urfa.
A la fin ya estamos bolados de la kanserya. Mos estamos iyindo a bever un chay para repozarmos. Ya kedimos tadre de emplear. Los çarşıs unos allado de otros, mos topimos en el çarşı de kovre:
‘Bakırcılar Çarşısı’. Las mujeres ke no les plaze emplear; ampesaron a merkar librikes (cezve), tavas, kozas para rekuerdos, kalderas chikas i otras kozas komo ke si no ay en Estambol…
Enfin ya terminimos las vakansas i estamos tornando a muestra kazika sin sar i sin mal.
Arivimos a Estambol a las mueve de la noche. El traje de Urfa fue mas kurto ke del aeroporto a muestra morada.
El trafik desgrasya, topar araba emposivle, todos arroncandosen los unos kon los otros, todos inyervozos…
En ke sivdad estamos pasando la vida!...
Kolay i livyano ke mos se aga los rezultados de las eleksyones (seçim) por el provecho del ‘pais’.
