Keridos lektores, oy pensi de azer un poko de moabet sovre el tyempo. Puede ser ke kedi un poko tadre de eskrivir por la Primavera, ma dayinda no puedo dizir ke la bivimos yena, yena. Oy, el kalendaryo esta amostrando el 10 de Junio. Una data ke deve naturalmente evokar el enverano i las vakansas. Asigun el kalendaryo, el enverano ya esta en muestra puerta ma, el tyempo lo esta kontradizyendo. Oganyo, tuve la impresyon ke la mueva sezon vino mas demprano. En los diyas de fin Avril, afilu ya uvo diyas ermozos ke mos izyeron reselar las kalores de Julyo i Agosto.
En todo kavzo, no kero ser muy pesimista. Siguro ke vimos las tulipas en los bulvares, kaminos prinsipal por ande estuvimos pasando, los parkos, en una sinfoniya de flores, de kolores a kolores. Otrun evento, fue el festival de tulipas eyas tambyen multikolor. Uno de los esloganos de la Munisipalita, era “Estambol, se esta topando kon sus tulipas, tres milyones de tulipas estan avyendo en el mizmo momento.
Devo admeter ke despues de los ermozos diyas de Avril, arrefresko un poko, i afilu mos keshimos de yelarmos. De vez en kuando, no syendo kompletamente siguros del tyempo, estuvimos salyendo kon jaketas o blazeres. Ansi, fuimos testigos de una kontradiksyon komika, porke unos, mas korajozos estan kon tee-shirtes o kamizikas delgadas Oy no se si es del aver, no kero eskrivir nada de seryozo o negativo.
Mos espertimos kon un sol briyando en un sielo klaro demanyana i pensimos de profitar de este trokamiento eksepsional. Tomimos el vaporiko de BEBEK, izimos un tur fin Emirgan, pasando por Kanlıca ets..i, sin abashar tornimos a Bebek, despues de azer el “ring”. En el parko, kedi un momento a kontemplar las kriaturas djugando i los bebes en las pusetas...todos luzyoz, todos savrozos!... Tornando a kaza, dayinda estava kon la vizyon inkomparavle del torno de mar i de las kriaturas i otros detalyos chikos, inosentes ma, influentes sovre la umor de la persona.
Para pueder deskuvrir los mil detalyos agradavles de la vida, kale ser dezeozos de bushkarlos. Son kozikas chikas ke mos alegran, mos dan kontentes i mizmo felisidad. No se si lo tengo eskrito mas antes, ma no sale danyo de repetar mi filozofiya de vida: “Por ampesar, devemos admeter ke, no solo las trandafilas tyenen punchones, ma, ke tambyen, İ LOS PUNCHONES TYENEN TRANDAFİLAS! Esto es una manera de pensar kon optimismo i no ver solo la facha negativa de las kozas i evenimyentos.
Ma, al pareser ke el diya mos estava rezervando otruna sorpreza. Verso la tadrada, sin relampagos, sin turguelos i sielo eskuresido ampeso una luvya fuerte. Durante 8-10 puntos, sin egzajerar, bivimos un chiko deluvyo.
No se komo va estar el tyempo kuando el lektor va meldar este teksto. Sielo eskuro?, fresko?, o azyendo luvya? Ke importa?...Ansi ke ansi, Julyo esta detras de la puerta i las kalores ke estamos reselando!!, tambyen. En todo kavzo, oy fue un diya de PRİMAVERA enteresante!!.
Otrun poko, vamos avrir la T.V, tomar las novelas i puede ser la majiya del diya va despareser. Ma, yo no kero ni pensar ansi. Penas, ansyas, novelas negativas no estan lavorando oy, estan en konje.!!! NIETZCHE tiene una palavra ke puedo tresladar ansi: “El Umano teniendo tanta pena, ansya i amargura, fue ovligado de deskuvrir, krear la alegriya i la riza por kompensar”. La vida es un regalo maraviyozo i los ke estan konsientes de esto, la biven komo disho el Sr. SHIMON PERES “Mirad kon esperansa al avenir i kon amistad a vuestra syedra i derecha”.
