La semana pasada Djueves a la noche/ erev Vyernes, un krimen horrivle fue desgrasyadamente perpetrado por kuatro jovenes djudyos supozados ser moradores de una de las kolonias İsraelyanas instaladas sovre Tyerras Palestinyanas.
Eyos echaron bombas Molotov sovre una kaza palestinyana, akto asasino ke provoko la muerte de un ninyo de 18 mezes kemado bivo bivo, entragado sin piadad a la krueldad de las flamas, eyas realmente inkonsyentes; sus jenitores ansi ke su ermano grande de 4 anyos gravemente ferridos, transferados immedyatamente a dos hospitales djudyos relativamente serka del lugar del drama. El padre se topa aktualmente en grande perikolo de muerte, i la madre ansi ke el bohor de los ninyos en un estado syempre muy grave.
Akto salvaje ke nyega la valor ethika i el humanizmo del sublime komandamyento del Dekalogo “No mataras” , presepto imperativo sovre el kual repoza la sivilizasyon en su totalidad.
Los agresores, la kara eskondida debasho una maskara, desharon detras de eyos sus sinyatura uzual ke es “el presyo a pagar” byervos absurdos eskritos en hebreo sovre una de las paredes de la morada insendyada ande morava la famiya Dawabcheh, lo ke un porta-boz militaryo İsraelyano konfirmo, prechizando tambyen ke la Armada djudia esta azyendo grandes esforsos afin de lokalizar lo autores del krimen.
La reaksyon de Benyamin Netanyahu fue immedyata i muy fuerte, el disho: “se trata sin dubyo de un akto de terrorizmo”. El Ministro de la Defensa İsraelyana konfirmo ke la muerte de un ninyo de 18 mezes es un akto horrivle i deklaro lo sigyente:‘No permetemos a terroristos djudyos de tokar a kualkyer vida Palestinyana inosente, este golpe kontra siviles no es otra koza ke un akto barbaro’.
El prezidente del Estado İsraelyano Reuven Rivling afirmo, el , ke este inyovle akto es el fruto de un djenero de laksizmo izraelyano del kual profitan los moradores de las kolonias djudias instaladas sovre territoryos Palestinyanos.
İ los myembros de “la opozisyon israelyana” komo tambyen de la ONU ansi ke de varyas Organizasyones no governomentales (ONG) denunsyan, eyos, la induljensya de la kuala gozan syertos haredim ekstremistos ke paradoksalmente perpetran aksyones kriminales de mas a mas frekuentes, referandosen al ovligo de kumplir la totalidad de las mitsvod.
Malorozamente semejantes aktos asasinos se repetan kon grande frekuensa de parte de syertos djudyos relijyozos enfohados en la lektura de vyejos tekstos biblikos de una manera estriktamente literal, sin bushkar el senso simboliko ke eyos puedran kontener
Ansi, Alhad el 2 del mes koryente el Governo İsraelyano anunsyo ke mezuras punitivas kontra los haredim ekstremistos seran tomadas, i el Primer Ministro afirmo ke el nivel de toleransya sera zero.
Ma eske esto abatsa?
Eske “el fakto de djuzgar de una manera severa el djesto inyovle i de kerer kastigar los responsavles” es sufizyente para rezolver el grave problema ke egziste aktualmente entre los dos puevlos antagonistos?
Ansi, me permeto de pensar ke realmente tenian razon los autores de la petisyon entitulada “Mozotros İsraelyanos luchamos por el rekonosimyento del Estado Palestinyano de parte de la Evropa” , publikada ay de esto unos kuantos mezes por el Partido ‘Shalom Ahshav’ i sinyada por aproksimativamente 1000 intelektuales İsraelyanos entre los kualos: grandes universitaryos, ex- grandes funksyonaryos i militaryos, ansi ke selebres eskritores tal ‘Amos Oz’, ‘David Grossman’, ‘Avraham B. Yehoshua’, ets…ets…petisyon de la kuala vos avia personalmente dado la traduksyon en djudeo-espanyol en mi artikolo del 31/12/2014.
Una de las motivasyones de esta petisyon era djustamente el dezeo de krear un estado palestinyano libre i responsavle al lado del Estado hebreo , kada uno protejado por frontyeras kontroladas i seguras, al lugar de lo ke es oy el ideal del aktual governo hebreo:“un grande İsrael bi-nasyonal kon dos puevlos adversos ke se esforsaran kada uno de su parte de dominar el otro i mizmo puede ser destruirsen resiprokamente.
La grandor de un puevlo no se prova por la superfisia de su payis ma por su propyo nivel de sivilizasyon i de moralidad.
