Dizir ke el mundo esta en estado de absoluta konfuzyon es poko ”el chaos politiko ,ekonomiko i sosyal aumentado por el alto nivel de la kalor” paresia myerkoles pasado render la atmosfera kaji irrespiravle, komo si una masa de plomo avia kaido de los syelos para destruir todo lo ke se topava sovre su pasaje...
Aktos kriminales son kontinualmente perpetrados en varyos lugares mizmo muy sivilizados, en vezes por adolesentes i ninyos,….Migrantes pyedren la vida en las altas mares …. Personas en estado de orasyon son matadas sin verdadero motivo ets…ets…
İ, en dos o tres semanas empesan los Muadim “Rosh ha Shana”, “Kipur”, “Sukod” ets… kada uno kon su sinyifikasyon propya i sus simbolos ke pushan por unos kuantos minutos kada djudyo (ke sea savyo o ignorente, optimisto o pesimisto, praktikante o no praktikante) a formular komo kada anyo a boz basha , unikamente para si mizmo , la mizma kestyon: “Kualo azer en el dezorden ande mos topamos kuando no savemos egzaktamente ke kamino sigir ?”
Me akodro aver eskrito antes munchos anyos en esta mizma pajina, la repuesta ke un grande Orator Relijyozo Djudyo de
Fransya avia dado despues su konferensya a uno de los oditores ke le demando “kualo azer kuando el dubyo vos persige?
“Meldar” avia dicho el Santo ombre, lo ke para el sinyifikava “Estudyar la Biblia , estudyar el Talmud”.
En efekto keridos lektores, “la lektura de uno de los vyejos livros ke mos son kaji sakros” mos ayuda kaji syempre a topar una repuesta a munchas de muestras preguntas i ansi a eskojer el kamino a tomar, ma a la kondisyon de meldar kada paragrafo en su senso simboliko i no literal, segun el konteksto sosyal de la epoka ande el fue eskrito i tambyen la sinyifikasyon ke kada palavra tenia en akeyos tyempos leshanos
No mos olvidarmos ke el mundo evoluo i ke varyos preseptos ke eran imperativamente nesesaryos en akeya epoka pyedreron sus valor inisyal. Por egzempyo, ay en muestro entorno tantas kozas ke se revelan a mozotros ermozas i djustas kuando en la antikuidad eran djuzgadas de una manera diferente, tal el relativamente muevo konsepto de “la igualidad de derechos entre ombres i mujeres” ke oy aze del “get” un faktor munchas vezes negativo .
A este propozito kero kontarvos la historya absolutamente autentika de dos mansevikos djudyos, una jovena de 18 o 19 anyos i un joven de 21 o 22 anyos, todos los dozos estudyantes universitaryos ke en sus momentos de libertad venian a la Matan Baseter para ayudarmos a yevar los paketos de komanya a las personas fizikamente desrepozadas ke no puedian tomarlos personalmente… Eyos dos komo tambyen munchos otros elevos de eskolas superyores partisipavan ansi a la mitsva de servir kon dulsor i respekto los ke tenian menester de apoyo fiziko i moral.
Un dia muestros dos jovenes vinyeron kon bonbones anunsyandomos sus serkano kazamyento sivil komo relijyozo; sus ojos estavan briyando de mil luzes, azyendo proyektos yenos de esperansa. Ma poko tyempo mas tadre, los vimos de muevo, malorozamente esta vez la kara obskura empapada de tristresa… Eyos venian del Grande Rabinato ande se avian ido para las formalidades nesesaryas de lo ke yamamos “espozoryo” primer engajamyento relijyozo delantre el ‘Bendicho Sea su Nombre’.El Haham ke los avia resivido les anunsyo el mizmo kon una grande amargura en la boz, ke no pudia realizar este primer engajamyento porke una mujer djudia no tenia el derecho de unirse a un bastadro”
El kavzo era ke en su manseves la madre del novyo fue kazada a un individuo de karakter infernal, furyozo i malo del kual eya se kijo despartir.
Sovre baza de nombrozos testimoyos del entorno i provas konkretas, el divorsyo sivil fue kaji immedyatamente akordado, ma vinyendo al relijyozo, aun los indisyos flagrantes de la mala vida ke le dava su marido, el Konsilyo Rabiniko se topo en la imposibilidad de akseptar la despartisyon por kavza del refuzo de parte del ombre ke fue su marido de akordarle el “Get”.
Mezes pasaron, i la manseva ke era luzya i meoyuda enkontro i se kazo sivilmente kon el ke mas tadre devia ser el padre del joven ke tuvimos el plazer de konoser.
Sinseramente muestra tristeza fue grande ma poko mas tadre, despues de aversen unidos ofisyalmente de parte del Governo Turko, eyos fueron en İsrael ande un Rabbino manko intransijente estudyo el kavzo i les akordo la Bindisyon Nupsyal Djudia.
Devo konfesar ke personalmente una terrivle revolta metyo por un momento en dubyo mi kreensa relijyoza i ainda me demando ‘deke estos dos maraviyozos mansevos briyantes en sus estudyos, sus komporto i sus partisipasyon al ayudo komunitaryo tuvyeron a sufriir de una semejante indjurya?’
