La semana pasada, ‘una simple kestyon konsernando la djusta sinyifikasyon de dos diferentes palavras ke a primera vista paresen kaji ekspresar la mizma koza’ preokupo el esprito de munchas personas. Eya es la sigyente: Komo nombrar los ke aktualmente fuyen de sus payis de nasimyento del kual eyos son los sitizanos naturales, para demandar azilyo a otros puevlos munchas vezes de relijyon diferente: ‘Migrantes? O refujyados?’
El diksyonaryo Larousse mos dize por la palavra Migrante: “Persona ke pasa de su payis a un otro payis en el objetivo de instalarse aya”. Refujyado: “persona ke fuye su payis por un otro, afin de salvarse de persekusyones.”
En efekto la Evropa se topa en este momento en una situasyon de terrivle hezitasyon delantre el problema al pareser insoluvle de la migrasyon de ombres i mujeres por la mas parte muzulmanos ke fuyen la Siria, el Irak, la Lybia i otros payizes afrikanos ande de una manera permanente los moradores se syenten en perpetual perikolo de muerte.
‘No akseptarlos i mandarlos de muevo al payis ande eyos se sintyeron amenazados’ es desharlos murir por falta de asistensya, lo ke byen entendido es kontraryo a kualkyer presepto de humanizmo. ‘El refuzo de ayudar personas ke se topan en reziko de pedrer la vida’ es konsiderado komo un akto por ansi dezir kriminal en kaji todos los kodigos ethikos i de mezmo en los konseptos los mas elementaryos de la sivilizasyon.
De otra parte, en la situasyon aktual, eske ‘akseptarlos sin azer ninguna distinksyon entre los ke paresen klaramente ser limpyos de kualker sospecho i los ke puedran posivlemente ser mal intensyonados’ no es avrir las puertas del kontinente Evropeo a una invazyon de personas ajenas de las kualas no se konose el real pasado ni el verdadero objetivo? Eske entonses el derecho de ‘self defensya’ no deve ser tomado en konsiderasyon?
Ke va devenir la vyeja Evropa de Descartes, Viktor Hugo, komo tambyen de Dante, Nietche, Sigmund Freud, Jean Paul Sartre, Martin Buber, Manuel Levinas i munchos otros…? Ke sera el futuro de este pedaso de tyerra ande nasyeron: Bach. Beethoven, Brahms o Debussy, komo tambyen Leonard de Vinci o Picasso ansi ke Einstein i otros savyos ? ke va devenir el Vyejo Mundo komo lo yamamos, kuando el sera a mitad yeno de personas ke pensan de una manera diferente?
Eske el multikulturalizmo es posivle en un mizmo espasyo vital? es ke kuando de las dos partes kada uno se engancha a sus solos simbolos sin akseptar de ver lo ke valen las kreensas de los otros, el polykulturalizmo es un enrikesimyento o un faktor de konfuzyon?
El solo punto ke es komun a todos los ombres aun la enormidad de sus diferensyas, es el orgolyo i el menester imperyozo de salir absolutamente viktoryozo de kualkyer antagonizmo sin azer el mas chiko esforso para entender la real vizyon de los otros. İ portanto todas las relijyones, la Kristyana, la Muzulmana o la Djudia, son bazadas sovre un kodigo moral ke tyene komo prinsipyo fundamental el respekto de la vida de ke persona ke sea.
Es ansi ke ‘la kreensa en Dyo’ no puede ser en ningun kavzo portadora de voluntad de muerte, por la simple razon ke kada uno de entre mozotros es una de sus kriansas.
Abraham Heschel, grande filozofo djudyo relijyozo del venten siglo, eskrivyo un livro intitulado “Dieu en quete de l’homme” (Dyo en bushkida del ombre) puede ser para afirmar ke (kon su libre arbitro, su persepsyon de lo bueno i de lo malo i su kapasidad de djuzgamyento) el ombre es la sola kriansa ke puede pensar i refleshir i no solo ovedeser syegamente a las impulsyones de sus instiktos.
