Muy Keridos Korelijionarios,
Todo en rengrasiando i agradesiendo a El Todo Poderozo ke nos ayego i este anyo a “Rosh Ashana” i a las “Fiestas der Tishri” de grande emportansa kon termos:
“Baruh Şeehiyanu Vekiyemanu Veigiyanu Lazeman Aze.”
Rogamos ke el nuevo anyo venga a nozotros kon todas sus bendisiones.
“Tahel Şana Uvirhotea”
El periodo ke empesa kon “Rosh Ashana” i sigue kon el “Yom Kipur” nos prezenta la mijor oportunidad de desidar a bivir una vida konforme a los preseptos divinos. Esto ya lo savemos muy bien i devemos de profitar de este periodo.
Tambien ya lo savemos muy bien ke nuestra fe i nuestras valores kulturalas son nuestros trezoros los mas presiozos i kon la fidelidad ke tenemos de atacharmos a todo esto kon sinseridad nos da la ovligasion de transmeterlos a las djenerasiones venideras.
“Ki İ Hohmathem Uvinathem leene Aamim.”
“Por ke esto es vuestra saviduria i entelidjensa en ojos de puevlos”
Esto bien siguro ke nuestros keridos ermanos no mankaran de apresyar la emportansa de “Rosh Ashana” i “Yom Kipur” i fiestaran el “Sukot” i el “Shemini Atseret” kon perfeksion konforme a nuestra egzistensia en un esprito de konfiensa a nuestro futuro.
Keridos ermanos,
En estos diyas es ke empesan las eskolas de nuestros ijikos donde eyos son la garansiya de nuestro avenir. Todos nozotros ke semos los testigos de el sukseso de edukasion de nuestra eskola esperamos tambien i ke este anyo no mankaran de alkansar a un sukseso dezeado a un nivel de edukasion ,Les suheto una aynada de sukseso a los elevos a sus profesores i a los dirijentes.
Tambien estos diyas son los diyas ke enpesan nuestras asosiasyones i fondasyones a una anyada nueva de lavoro. No ay dubyo ke esto konsiente de sus grande emportansa i sus abnegasion dentro nuestra kolektividad donde les auguro una aynada fruktuoza.
“Vekulam Yitbarehu Mimaon Aberahot”
“ İ todos Saean Bendichos de la fuente de la Bendisyon ”
Keridos Korelijionarios
En estos diyas ke nos enfegusyamos a la miserokordiya de El Todo Poderozo rogo y espero ke guadraremos la unidad, la solidaridad i la kerensya mutual en un modo progresivo porke en estos diyas esto es lo mas emportante.
Siendo yeno de estos pensamientos i sentimientos vos bendigo kon todas las bendisyones de nuestra santa Tora, todo en augurandovos ke alkansech a fiestar munchos anyos todos vozotros kon todos vuestros keridos en pas, sanedad, prosperidad i buenas esperansas.
“Leshana Tova Tihatevu”
“Tizku Leshanim Rabot”
Rav İsak HALEVA
Gran Rabino
