“Vas a amar el estranjero komo ti mizmo, porke tu fuites estranjero en tyerra de Ayifto” (Levitik XIX,34)
Esta semana senti en mi, de una manera imperyoza i mizmo kaji imperativa, el menester de eskrivir este primer artikolo del anyo hebreo 5776 sovre un sujeto si no enteramente optimisto, lo ke en estos tyempos es una koza imposivle a realizar, ma a lo manko sovre un thema avyerto a la esperansa.
Tres o kuatro faktos ke meldi ay de esto unos kuantos dias en diferentes diaryos despertaron en mi una vyeja esperansa de ver un dia un djenero de renasimyento de las valores ansestrales djudias, faktos ke dezeo komunikarvos.
EN İSRAEL: Segun lo ke meldi, a kuarenta minutos de tyempo en otomobil a partir del Norte de Telaviv, (debasho la kompetensya de un grupo de desizyonaryos sinseramente atados a sus relijyon sin kayer en kualkyer ekseso) se esta fraguando una chika sivdad de lakuala las moradas son vendidas a un presyo muy konvenivle a klientes de diferentes partidos politikos, a ultra nasyonalistos komo a sosyalistos, a sinseros praktikantes relijyozos ke kumplen totalmente las mitsvod de sus Fey i a los ke son manko atados al ritual preskrito, i tambyen a muzulmanos de nasyonalidad Israelyana realmente byen asimilados…una sivdad ande todos seran prontos a dar la mano a sus konsivdadinos malgrado todo lo ke puede ser los desferensya los unos de los otros.
EN ALMANYA: Savemos todos ke desde unas kuantas semanas olas insesantes de migrantes orijinaryos de İrak i partikolarmente de Siriya demandan avrigo a la Evropa, sovre todo a la Almanya ke les avyo grandes sus puertas i ande egzisten varyos”Sentros de resivo” entre los kualos una organizasyon djudia nombrada ZWST muy sensivle a la sufriensa de estos fujitivos ke fueron ovligados de abandonar sus patria de nasimyento, ansi ke sus uzos i kostumbres de kada dia para enfrentar muevos konseptos i muevas reglas de vida.
La Organizasyon ZWST fue fundada en Almanya en 1917 para protejar las bivdas i los guerfanos de los kombatantes djudyos ke avian perdrido la vida durante la Primera Gerra Mundyal. Tambyen al empesijo de la era Nazi, eya (en la mezura ande esto era posivle) fasilito a nombrozos djudyos de salir del payis entonses kriminal, para avrigarsen en lugares mas klementes. De mezmo despues la disolusyon del Governo Sovietiko, eya ayudo bastantes de muestros korelijyonaryos a ir instalarsen en İsrael,
İ oy, aun ke la kestyon de los refujyados muzulmanos reprezenta para los sitizanos djudyos del payis un problema simultaneamente “de piadad” i “de inkyetud personal”, este mizmo sentro djudyo aze todo su posivle para fasilitar la integrasyon de los migrantes aktuales a konseptos diferentes de los ke konosyeron en sus payiz de nasimyento.
Un gazetero disho: “Koza kuryoza, munchos de estos migrantes muzulmanos ke se engrandesyeron en una atmosfera de aboresimyento por los djudyos, van espontaneamente en sus direksyon para demandarles konsejo i ayudo”.
En efekto este fakto es sorprendyente…una de las razones es provablemente ke entre los muevos venidos, se topa unos kuantos ke avlan mas o menos la lingua sovietika, idyoma ke no es estranjero a la mas parte de los myembros de la organizasyon ZWST.
EN FRANSYA: Durante una seremonia a la memorya de los martiryos de la deportasyon de la segunda gerra mundyal, el Gran Rabbino de Fransya Hayim Korsia demando a todos los dirijentes de su komunidad de inspirarsen de las aksyones de los ke (a la epoka del nazizmo) sin ser eyos mizmos djudyos, avian salvado una multitud de muestros ermanos, i de ayudar oy kon aktos pozitivos los aktuales refujyados a integrarsen harmonyozamente a una manera de bivir differente de la ke konosian.
Ansi, grandes İnstitusyones djudias de Fransya giadas por la nosyon de “Tikkoun Olam” se aunaron afin de ofreser, kada una segun su kompetensya, un braso de apoyo a los muevos venidos.
Aparte esto, las diferentes Autoridades relijyozas Monotheistas Evropeas (İmames, Prelatos Kristyanos i Rabbinos) ke tenian asta agora el uzo de aunarsen para diskutir de kestyones theolojikas, tomaron aktualmente la desizyon de no kontentarsen solo de diskutir ma de asumir la responsabilidad de una intervensyon konkreta.
Asta este mommento el problema de la migrasyon no fue realmente rezolvido i no savemos si ay una probabilidad ke lo sea un dia. Los payizes del Este de la Evropa seraron sus frontyeras definitivamente, la Almanya tambyen lo izo ma provizoryamente afin de arreglar syertos problemas teknikos.
Aun esto, los puntos luminozos de loskualos avlimos mas arriva aparesen syempre en la opasidad de las tinyevlas ande mos topamos. Por seguro ke no son bastante fuertes asta darmos una verdadera esperansa para el futuro, ma kada uno de entre eyos reprezenta un apoyo moral ande pueder engancharmos.
