Kon un sesto de las primeras frutas, i la baklava de mansana: Vos sueto Shana Tova
Baklava de Mansana (light), kon azete de oliva
5 mansanas rayadas
½ kupa de azete de oliva
1 kupa yena de muez
15 telas de fila fina (yufka) de baklava
½ kupa de miel
1 kuchara de kanela
Para servir: Pekmez (molasses/melasa)
La preparasion:
Las mansanas despues de rayarlas i meterlas en el tropito para eskurrirlas, se les adjustan la miel i la muez.
El plato del orno se unta de azete antes de tomar las 5 telas de fila fina (yufka de baklava) a una a una, i kon una kucharika se aregla entre kada una de las telas la azete.
Se toma la mitad de las mansanas preparadas para kuvrir las 5 primeras telas de fila.
Se kontinua a meter 5 telas de fila kon azete i la otra mitad de las mansanas, i a kuvrir finalmente kon las 5 filas de alkavo kon azete.
Despues de asender el orno i kayentar a 170 C, .se koze en 30 minutos.
Se desha repozar un sierto tiempo i se sierve kon Pekmez (molasses/melasa).
RAV YEUDA ADONİ MOS KONTA: EN LA PERASHA DE Kİ TAVO
“El savyo Arambam, en el livro ‘More Nevuhim’, trae una razon por la enkomendansa en dando los primeros frutos a el Koen en el santuvaryo delantre de el Kriador en orasyonando i akseptando ke todo lo bueno ke el poseda es una dadiva de el Kriador Bendicho El.
AREGALAR LOS PRİMEROS FRUTOS, ES ENFORTESER LA PERSONA, ENSİ MİZMO LA NATURA DE JENEROZİDAD İ APOKA SUS DEZEOS DE SU ALMA.
Esta tomando el sesto de frutas en su ombro i se lo esta yevando a el santuvaryo a darselo a el Koen mizmo.
Tambien esta mitzva, enkomendansa, embeza a el ombre de ser umilde a akeya persona ke es patron de kampos i vinyas.
Dunke este jesto aziya akodrar, ke nozotros fuimos esklavos en Ejipto a Paro i agora el Kriador nos dyo muncho bueno i rikeza.”
