En efekto, ke esta afitando al Oriente Medyano komo al Serkano, todos los dos igualmente rikos de dos sivilizasyones, la una asiatika la otra Evropea?
Desde Shabat una grande tristesa parese obskureser la atmosfera de todos los ke se syenten solidaryos de la lucha por el humanizmo ansi ke por la ermandad. İ en estos dias, munchos de entre mozotros mos topamos en estado de dolyo afektivo a la sigida del golpe kriminal perpetrado Shabat en Ankara durante una manifestasyon “en favor de la paz” ke kosto la vida a 95 de muestros kompatriotos i firyo 246 otros entre los kualos 48 se topan syempre en estado de menester urjente de kudyos intensivos.
Deke este refuzo resiproko los unos de los otros? deke esta persistyensya de un odyo inkomprensivle entre kriansas pensantes? Ken pudo perpetrar este krimen no solo odyozo ma absurdo? No es kon las armas ke se puede venser kualkyer ideal (sea djusto o indjusto) ma kon la palavra i kon aktos pozitivos de vida.
Ma (lo repeto) ken es el autor del akto inyovle de shabat demanyana?…un grande personaje politiko pronunsyo komo probabilidad el nombre de “İşid” (el Estado İslamiko instalado en Irak) sin a la sigida ninguna konfirmasyon ni ningun desmentido.
Koza kuryoza, desde unos kuantos anyos el ombre parvino a venser muchas difikultades ke paresian invensivles; oy la medikeria reushe a kurar males ke paresian inkuravles, progresos intelektuales i teknikos fueron realizados, la ambrera (esta vyeja enemiga del ombre) fue parsyalmente vensida i en este momento se lavora syempre para venserla en su totalidad, ma malorozamente nunka se parvino a abolir kompletamente esta antigua animozidad del ombre kontra el ombre.
Aktualmente es kaji lo mezmo entre los mansevos İsraelyanos i los Palestinyanos loskualos, kuchios byen aguzados en la mano, se enfrentan kon hostilidad los unos kontra los otros, lo ke a syertos momentos aze pensar a la posibilidad de una tresera intifada.
Segun lo ke mos dize Jean CORCOS de la Radyo Djudia Franseza: “Es verdad ke ay una situasyon mas o menos semejante entre la segunda İntifada del anyo 2000 i la situasyon aktual… Entonses komo agora, los golpes kriminales empesaron a la epoka de los grandes muadim: ‘Roshashana’,‘Kipur’ i ‘Sukot’, debasho el preteksto de una profanasyon de la Grande Meshkita Al-Aksa de parte de los kreentes djudyos ke van vijitar los Lugares Santos del djudaizmo , i de mezmo, en los dos kavzos se ve ke es a la sigida de un total blokeo de las negosyasyones de paz entre İsrael i el Estado Palestinyano ke pujan los atakes asasinos”.
Jean Corcos kontinua kon estas palavras: “…ma la grande diferensya entre las dos epokas es ke en el anyo 2000 se topava a la kavesa de Israel un Governo amorozo de paz, mientras ke oy en Yerushalayim se topa un Governo kompuesto del Likud l de aliados ultra nasyonalistos kontraryos a kualkyer konsesyon sea mizmo muy chika, lo ke produze una atmosfera negativa a un posivle akordo. Esta situasyon puedra trokar unikamente en kavzo de un governo de Unyon Nasyonal ande el partido Sionisto remplasara el partido de Bennet, el kual es (syempre) obsedado por muevas implantasyones.”
En el anyo 2000 la ruptura de las negosyasyones de “Camp David” fue provokada por el objetivo estratejiko Palestinyano de ovligar İsrael a akseptar una kondisyon realmente inakseptavle: “akordar el derecho de retornar a los ke fuyeron el payis durante la gerra de 1949 ”lo ke realmente es la sola kondisyon a la kuala İsrael no puede nunka someterse por la simple razon ke seria un verdadero suisidyo de su parte.(fin de sitasyon del artikolo de Corcos)
Tambyen Frederic Encel, doktor en jeopolitika de la Universita Paris 8, mos dize consernando una tresera İntifada: “En Jeopolitika “lo peor” (en kötüsü) no es nunka serguro…mizmo si desde unas kuantas semanas ay una pujita de violensa entre İsraelyanos i palestinyanos, una tresera intifada no es inevitable, la razon es ke aktualmente las kondisyones sosyo-ekonomikas de los Palestinyanos de Sisjordania se mejoraron desde 10 anyos, mientras ke en 1987 kuando empeso la primera intifada, la prekaridad i la falta de lavoro se adjuntavan a la absensya de perspektivas politikas..
De otra parte, al pareser, los ekstremistos del Hamas demandaron a Israel una treva afin de impedir una posivle penetrasyon del Daesh/İşid en sus rango.
En todo kavzo, İmposivle de no formular una ultima kestyon: Es ke egziste una esperansa ke un dia, en un futuro no muy leshano, İsraelyanos i Palestinyanos puedran bivir en paz, la mano en la mano komo dos buenos vezinos?
