La prensa mos ambeza ke una versyon kritika en lengua almana del maldicho livro Mein Kempf (mi kombate) sera prezentada al publiko en varyas librerias a partir de los primeros dias del anyo 2016.
De mezmo ‘el mizmo lavoro de kritika’ se esta azyendo en Fransya, versyon ke sera publikada en la lingua del payis al empesijo del anyo 2017.
El orijinal fue eskrito por Hitler entre los anyos 1924 i 1925 kuando el futuro Fuhrer se topava enkarselado despues la desfecha del putsch ke el avia projetado de realizar en Bavyera.
Tal ke todos lo savemos, este livro es un djenero de deliryo paranoyak ke afirma la supremasia inkontestavle de la rasa jermanika i ke kontyene la esensya de su maldicho programa de eliminar la totalidad de personas ke (segun su teoria) son de rasa inferyor, entre las kualas prinsipalmente la rasa de los djudyos i la de los bohemyanos.
Komo por seguro todos los lektores ya lo saven, ‘Mein Kempf’ tuvo malorozamente una influensa irrezistivle sovre una grande parte del puevlo jermaniko de akeya epoka, asta mizmo blokar el esprito i la sensibilidad de muy grandes intelektuales ke no solo no pronunsyaron la mas chika palavra de kontestasyon, ma al kontraryo manifestaron sus akordo i mizmo (en syertos kavzos) partisiparon a su realizasyon.
Ansi, es imposivle de no demandarmos ‘lo ke aktualmente puedran ser los varyos refleksos’ ke la reedisyon (mizmo kritika) de este livro provokara en el esprito de munchas personas ke tyenen una vizyon (absolutamente diferente de la muestra) konsernando los akontesimyentos mundyales.
Roger Gukierman prezidente del Konsilyo Reprezentativo de las İnstitusyon djudias de Fransya (le Crif) parese ser muy pesimisto i mizmo inkyeto al sujeto de lo ke puedra ser la reaksyon a esta edisyon kritika de Mein Kempf. El disho “kualo se pasara kuando este livro (mizmo en su versyon korrektiva) sera para munchas personas un livro de kavesera? En todo kavzo el demanda ke la ‘Fundasyon para la Memorya de la Shoah’ sea prezente en el lavoro ke sera echo en Fransya.
Alain Jakubowicz prezidente de la Licra (Liga İnternasyonal Kontra el Antisemitizmo) pensa ke la prohibisyon del “mal” no empide la egzistensya del mal. El dize: ’La reedisyon de Mein Kempf es inevitavle, espesyalmente por razones juridikas.’
Los personajes sitados mas arriva son ‘todos los dos’ fervyentes djudyos profundamente konsernados por el futuro i la perenidad de İsrael ansi ke del Djudaizmo mundyal, i portanto en esta sirkunstansya sus opinyones no paresen ser muy semblavles.
En todo kavzo, en la instabilidad de una humanidad heterojena, leshos de kualkyer verdadera lojika, en este estado kaotiko ande el ‘individuo humano’ se topa kontinualmente konfrontado a konsepsyones ke aspiran a matar inosentes en favor de tekstos antiguos, ke sera la reaksyon de los ultra nasyonalistos ansi ke de los ultra relijyozos oksidentales komo orientales? İgualmente ke sera el simple sentimyento de varyas otras personas ke ainda oy no renyegan enteramente el programa hitleryano de eksterminar las rasas konsideradas komo inferyores, entre las kualas munchas vezes se nombra ‘la djudia’ kompuesta de ombres i mujeres ke en el pasado fueron durante un largo largo tyempo un puevlo sin tyerra propya?
Ke sera el reflekso de syertos de estos mansevos i adolesentes palestinyanos ke la prensa estranjera yama envezes ‘los guerfanos de Oslo’ ? i patikularmente de los myembros de mas a mas nombrozos i de mas a mas krueles del djihadizmo moderno?
Komo dicho al empesijo de este artikolo, Mein Kempf fue un livro muy persuasivo ke parvino a konvenser no solo una enorme fraksyon del puevlo alman, ma tambyen grandes filozofos i muzisyanos los kualos kedaron insensivles delantre la eksterminasyon de inosentes i mizmo konservaron intakto sus respekto por los ke a esta epoka obskura eran los grandes responsavles de sus payis.
Ay en el absolutizmo de kualkyer ideal, un perikolo kaji permanente de ayegar a un estado de kompleta inkonsyensya i mizmo de total irresponsabilidad.
