Kon grande pena me ambezi ke muestro gran amigo, muestro pionaryo, ombre simple i simpatiko, el Sr. Yitzhak Navon mos desho la buena vida. Ay personas ke dezeamos ke nunka no mos deshen, mizmo si tienen 120 anyos. El Sr. Navon no bivyo asta los 120 ama todos los sefardis del mundo suetavan ke lo aga. El no solo fue prezidente del Estado de Israel ama fue uno de los prezidentes amado por todos.
La primera vez ke sinti avlar de el fue kuando Izzet Bana mos trusho kuando eramos muy muy mansevos en el klub de mansevos, Dostluk Yurdu Derneği (1977) un disko del famozo muzikal ke el avia eskrito, Bustan Sefaradi. Es kon akel disko ke mos se esperto el interes por la muzika i erensya kultural sefardi.
Yo personalmente tuve munchas okaziones onde tuvimos kontaktos muy simpatikos. El mos keriya muy bien a muestro grupo, Los Pasharos Sefaradis i en kada okazyon azia su mijor para vinir a sintirmos sea kuando estava en Turkiya, sea kuando mozotros estavamos en Israel. Me akodro una vez mozotros estavamos mas tadre en el program i el se devia de ir mas temprano porke tenia una reunyon importante. Izo lo ke izo, disho, “Yo kero sintir a Los Pasharos. Ke salgan mas antes, porke despues devo de irme!” I este modo se izyeron los echos. Mozotros aktuimos a la ora ke kijo el, i despues alegre i kontente el salio del salon. Me akodro otra vez le dimos un konserto muy spesial aki en Estambol, en la kaza del Sr. Jak Kamhi. Kuando kantimos muestra version de la kantika grega “Ayde Tomalono” el mos disho ke el save otras palavras i mo las dio las palavras en akel momento. Tantos rekuerdos kon esta kerida persona!
Kuando avrimos muestro Sentro Sefardi de Estambol, el estuvo muy kontente i en los kongresos ke tomaron lugar en Israel, mos renkontrimos munchas vezes i siempre muy amavle mos abrasavamos i mos bezavamos. Siempre kon kara dulse, siempre, kon la sonriza i siempre saludando a todos komo si fueran sus gran amigos i lo mas ya lo eran. La dalkavo vez ke lo vide fue en el primer Dia del Ladino enternasyonal, kuando Los Pasharos fueron invitados komo invitados de onor. Akel dia el mos avlo de su chikez i de su familya donde se avlava el Judeo-Espanyol. Un diskorso muy muy simpatiko.
Nunka mos olvidaremos de este ombre maraviyozo ke supo tener la şama de la kultura sefaradi ensendida i biva toda su vida. Ke su alma repoze en Ganeden!
