“129 muertos entre los kualos a lo menos los ochenta en la sala de konsertos i espektakolos “Le Bataclan” i mas de 300 feridos entre los kualos los 90 en estado muy grave”; tal fue el rezultado de los golpes de 6 diferentes grupos de terroristos, los kualos vizivlemente atados a la mizma ideolojia djihadista, atakaron kaji simultaneamente en el espasyo de 30 minutos, 6 lugares diferentes en Paris i su enterno.
La Prensa mos ambeza ke entre los agresores se topava tres o kuatro fransezes, ijos puede ser de ansyanos migrantes ke provablemente anyos antes se avian instalado en el payis de Descartes afin de fuir la mizerya de sus propyo lugar de nasimyento.
Tambyen, entre los ke atakaron la kapital franseza, dos de entre eyos fueron inskritos komo simples migrantes en una İzla Grega, la kuala es uno de los primeros lugar de akolyo de los fujitivos orientales en Evropa.
Aktualmente en Paris, no es el chaos ke reyna, ma ‘la dolor’, ‘el dubyo’ i ‘el espanto de lo ke seran los dias a venir’ .
10 mezes despues de los asaltos kontra “Charlie Hebdo” i kontra el chiko sentro de komanya glad kosher, este ultimo drama fue la tresera manifestasyon de odyo del djihadizmo kontra la sivilizasyon.
Entre los 6 lugares ke fueron atakados el ke tuvo lo mas de muertos fue “Le Bataclan” ande munchas vezes se da konsertos i espektakolos en favor de ovras karitativas la mas parte del tyempo djudias.
Es ke este fakto es el produkto de una simple koinsidensya? O un akto de odyo viseral anti djudaiko? Por las oras nada lo konfirma ni nada lo infirma…los dias avlaran.
En un pasado no muy leshano, el atentado kriminal kontra la eskola djudia de Toulouse ande muryeron en sus inosensya ‘ninyos İsraelyanos’ ke desharon no solo sus proksimos ma tambyen munchas otras personas en un estado de doloroza perpleksidad, i tambyen mas tadre los atakes en el muzeo djudyo de Beljika ansi ke munchos otros semejantes kavzos en multiples otros payizes fueron komo sinyos premonitoryos ke anunsyavan la trajedia de vyernes pasado .
Ansi, en desparte de la horor ke estos golpes de terrorizmo provokaron, la Evropa se topa en este momento en una situasyon de terrivle hezitasyon delantre el problema al pareser insoluble de la migrasyon de ombres , mujeres i partikolarmente ninyos por la mas parte muzulmanos ke fuyen la Siriya, el İrak i otros payizes ande de una manera kaji permanente los moradores se syenten en perpetual perikolo de muerte.
Komo ya fue dicho en esta mizma pajina ay de esto unas kuantas semanas, ‘No akseptarlos i mandarlos de muevo al payis ande eyos se sintyeron amenazados’ es desharlos murir por falta de asistensya humana, lo ke byen entendido es kontraryo a kualkyer presepto de humanizmo i konsiderado komo un akto por ansi dezir de inspirasyon kaji kriminal en todos los kodigos ethikos i de mezmo en los konseptos los mas elementaryos de la sivilizasyon.
De otra parte, en la situasyon aktual, es ke akseptarlos sin azer ninguna distinksyon entre ‘los ke paresen klaramente ser limpyos de kualker sospecho’ i ‘los ke puedran posivlemente ser mal intensyonados’ no es avrir las puertas del kontinente Evropeo a una invazyon de personas de las kualas no se konose el verdadero objetivo? Eske entonses el derecho de ‘self defensya’ no deve ser tomado en konsiderasyon?
Nombrozos de estos aktos empapados de odyo son perpetrados debasho el preteksto de una fidelidad absoluta al Koran . Es verdad ke en un dezeo de fidelidad absoluta a la relijyon, munchos individuos konsideran kada presepto relijyozo komo un sujeto sakro ke no soporta la mas chika modifikasyon, ma syertas otras personas, partikularmente las ke tyenen una vizyon mas ancha del pasado, se ambezaron a meldarlos no en la integralidad de sus formulasyon primitiva, ma en la bushkida i la persepsyon de sus real sinyifikasyon de baza.
Es puede ser urjente ke los grandes dirijentes de las tres Relijyones Monotheistas, savyos absolutamente sinseros en sus interpretasyon de los vyejos tekstos, se rekojan entre eyos para enfin krear una situasyon de posivle entendimyento mutual i puede ser ansi de fraternidad.
