Komo dicho en mi artikolo de la semana pasada: Aproksimativamente onze mezes despues los golpes asasinos kontra ‘Charlie-hebdo’ i ‘el chiko merkado glad kosher djudyo’ la Fransya en este momento se topa de muevo en estado de doloroza emosyon despues los ultimos eventos de Vyernes el 13 del mez koryente, perpetrados esta vez por sesh grupos de djihadistos (entre los kualos jovenes nasidos i kresidos en el payis de Decarte) faktos ke provokaron la muerte de mas de 128 personas en sesh diferentes lugares de Paris, sivdad luminoza oy en dia en situasyon de vijilensya maksima ke puedra ser mentenida durante unos kuantos mezes.
De mezmo, konsyente de la prezensya sovre sus tyerras de semejantes individuos, ijos puede ser de los primeros migrantes venidos en Evropa despues la disolusyon de varyas kolonias, la Beljika tambyen entro en situasyon de intensiva alerta. Eya anunsyo ke 22 perkizisyones fueron echas en la aglomerasyon muzulmana de Bruksel i de su entorno ma kel individuo nombrado Salah Abdelskam sospechado de aver partisipado a los atakes de Paris no pudo ainda ser topado.
En ingletera, David Cameron deklaro de su parte, ke tyene la konviksyon ke Londra deve absolutamente desidar de intervenir kontra İŞİD/EI en Siriya.
En el Mali, insertidumbre konsernando los ke perpetraron el atake kontra el hotel Radisson Blu de Bamako elkual provoko la muerte de 22 personas entre las kualas las 14 eran estranjeras, ombres de echo o turistos.
No mos olvidaremos tambyen el golpe kriminal en Ankara en una manifestasyon poko antes la eleksyon lejislativa Turka, fakto trajiko ke kavzo un grande shifro de muertos i ke fue revendikado kaji immedyatamente de parte de İŞİD.
De mezmo, ay de esto unos kuantos dias, Shabat pasado si no me yero, el falso anunsyo de una bomba en un avion de la Turkish Air Line lo ovligo de retornar immedyatamente al aeroporto de partensya, fakto bendicho el Dyo sin sar i sin mal, ma ke provoko una fuerte emosyon en kaji todos los viajadores i myembros del ekipaje…No se puede atribuir esto a una kualkyer broma (shaka) ke en semejante kavzo kostaria a su autor un largo tyempo de enkarselamyento.
Aktualmente bivimos en un tyempo de peligro i de inkyetud ke semos ovligados de akseptar sin por esto renunsyar a la realizasyon de kualkyer de muestros proyektos, byen entendido kon prudensya i akavido.
Uvo munchas vezes semejantes periodos de diŞkultad en la historya del mundo, uvo un djenero de alternansa kontinual de siklos retrogrades i obskuros sigidos (a la favor de un kualkyer evento pozitivo) por siklos luminozos de progreso i promosyon.
Fue ansi despues la segunda gerra mundyal kuando uvo un periodo de unas kuantas desenias durante las kualas ‘el mundo oksidental’ i mizmo ‘el Oriente Serkano’ konosyeron dias de amistad mutual ansi ke de kreasyon de muevos konseptos i ideales, periodo ande fue promulgada “la Deklarasyon de los derechos del ombre” i kreadas las dos institusyones universales nombradas “Onu” i “Unesko”…
Fue sovre todo ansi despues la “Shoah”, kuando fue kreado el Estado Hebreo nombrado “İsrael” ke immedyatamente fue rekonosido de parte de la ONU i ande djudyos de las kuatro partes del mundo se presipitaron kon fervor para krear un muevo puevlo ke konosyo los primeros tyempos lo ke es la verdadera ermandad aun ke munchas vezes kada uno avlava una lingua diferente.
P.S. (muy importante) Vengo de meldar en el diaryo fransez “le Monde”lo sigyente: “Les Etats-Unis ont lancé lundi 23 novembre une alerte mondiale sur les risques de voyager pour leurs ressortissants partout dans le monde, en raison d’une hausse des “menaces terroristes”. Après les récents attentats, notamment en France et au Mali, le communiqué du département d’Etat invoque « des informations actuelles laissant penser que l’EI (l’Etat islamique, NDLR), Al-Qaïda, Boko Haram et d’autres groupes terroristes continuent de planiŞer des attaques terroristes dans de multiples régions »
En savoir plus sur http://www.lemonde.fr/international/article/2015/11/24/etats-unis-alerte-sur-les-risques-de-voyager-en-raison-d-une-hausse-de-la-menace-terroriste_4815936_3210.html#HfzHMI2tPpkhfYSf.99.
