Alhad demanyana tuve la shans de sintir İvo Molinas El Direktor de Publikasyon del jurnal Şalom, en el kanal CNN Türk. El jurnalisto Hakan Çelik; arrisivyo los reprezantantes de las minoridades ke biven en este pais.
Laki Vingas reprezantante de los gregos, i Cenk Taştan reprezantante de los ermenis, estavan endjuntos kon İvo Molinas; avlando sovre lo ke la persona syente (hissetmek) kuando es una minoridad en un pais. Un moabet de buena umor entre los kuatro kon las demandas enteresantes del jurnalisto.
Entonses, İvo Molinas; izo konoser el jurnal Şalom a los partisipantes kon El Amaneser ke es la sola revista en el mundo entero, en djudeo-espanyol ke sale al mez una vez. El disho ke; el jurnal se esta puedyendo publikar kada semana; grasyas a una arma de sesenta volontaryos i volontaryas.
Todos avlaron sovre los sujetos de ser aktivos en la medya sosyal; para ke el puevlo mos konoska, de pueder utilizar muestros nombres sin espanto, la rekonstruksyon de la Sinagoga de Edirne, la situasyon de los djudyos i munchas otras kozas…
La avla de İvo fue a mi idea; la mas korajoza entre los otros, en dizyendo la verdad, mostrando egzempyos de los evenementos ke los djudyos fueron ekspozados a sufriensas incustas (haksız) antes sinkuenta sesenta anyos; i ke kale defendermos en avlando, en eskrivyendo, para ke el puevlo konoska los djudyos lo ke son, ke ay entre eyos proves komo rikos…
Despues mos fuimos kon mi marido a Alef el salon de la eskola djudiya para partisipar a la avla de Zülfü Livaneli; un ombre de grande valor; un muzisyen, un politiko (politikacı), un direktör (yönetmen), un eskrivano.
El eskrivyo ocho livros, tyene 25 albumes de muzika, 300 kompozisyones muzikales (beste) i kuatro Şlmos.
Pasar doz oras kon el fue un privilejyo (ayrıcalık) para todos mozotros.
Aviya kaji 200 personas ke asistyeron por partajar sus ideas.
En el anyo 1996; Livaneli fue elijido (seçilmek) komo ambasador por el UNESCO ke el sentro se topava en Paris.
Oy en dia; Livaneli es el eskrivano prensipal del jurnal Vatan, i esta kontinuando a su misyon de ambasador de kultura en el UNESCO.
Resivyo munchos premyos en su vida, persona reushida en munchos espasyos diferentes.
En el anyo 1997; el dyo un konserto en Ankara ande 500.000 personas partisiparon a este konserto.
El reusho a tomar el titolo de pueder realizar el mas grande konserto en Turkiya.
El ampeso a avlar en remersyando ke lo envitaron i mos dyo unos kuantos egzempyos de lo ke eskrivyo en sus livros.
En 1975; en uno de sus livros el eskrivyo ke; “Despues de una perioda, las personas de la Afrika i Asya, se van a suvir a unas naves primitivas para pueder fuyirsen i iyirsen a la Evropa, a la Amerika… Eyos van a forsar las frontyeras (sınırları zorlamak), para emigrar a paises diferentes en ovligandolos para ke aksepten la emigrasyon.”
Oy estamos bivyendo esta emigrasyon i dingunos no esta salyendo a bash (başa çıkmak).
Zülfü Livaneli kontinuo en dizyendo ke en el mundo ay; “la incustisya de la repartisyon del revinido (gelir dağılımı adaletsizliği), la provedad i la rikeza no en un nivel (seviye) normal; ma ay munchos muy proves i otros muy rikos.
Los ke estan en un nivel mas abasho keren alkansar al otro i esto esta sostenyendo (beslemek) el terorizmo.
Su idea es ke; el terorizmo el mas grande salyo en medyo en el ‘Medyo Oryente’ (Ortadoğu).
El analizo el terorizmo i disho: “Matar la rasa de los umanos, eliminar las personas, apartyene solamente a los umanos.”
En el syeklo ke estamos bivyendo la tortura (işkence) i el terorizmo pujo. El mundo se undyo en los marekajes (bataklık).
Despues kon las kestyones de los partisipantes se avlo de la politika, de la situasyon del puevlo, del pais, kualo se puede azer, la emportansa de la formasyon, de la enstruksyon i de la edukasyon…
Oy la inyorensa (cehalet) esta mas a delantre de la saveduria, de la konosensya (bilgi). Para ke un pais adelante; kale dar una grande emportansa a la kultura.
Fue un dia reushido i yeno de kultura.
Felisitasyones a los dirijentes de este alhad fruktuozo (verimli).
