En una Fransya ferida en sus sentimyentos i su dinyidad desde el empesijo del anyo koryente, ma ke se obstina a luchar kontra el dezespero i el negativizmo afin de konservar intaktas sus valores de baza imprenyadas de demokrasia, igualidad i fraternidad, un muevo livro vyene de ser publikado, entitolado “La fuersa de la alegria” debasho la sinyatura de Frederic Lenoir, el kual afirma ke ‘el fakto de saver engancharse a la mas chika alegria’ es un akto pozitivo de rezistensya i mizmo una verdadera viktorya kontra el obskurantizmo.
Es la razon por la kuala me vo esforsar de dar aproksimativamente a mis lektores, la traduksyon en djudeo–espanyol de un chiko rezumen de la entrevista ke el autor del livro tuvo kon un gazetero de la revista semanal ‘Le Point’.
A la kestyon: “Komo avlar de la fuersa i del poder de la alegria en estos dias dolorozos ande mos topamos aktualmente?” formulada de parte del djornalisto ‘Jerom Cordelier’, el autor del livro ‘Frederic Lenoir’ respondyo:
“Es djustamente en semejantes momentos ke kale azerlo, i kon fuersa, mizmo si esto puede pareser un paradokso. Los ke mos atakan bushkan syempre a jeneralizar el espanto, ansi la mijor koza ke tenemos a azer es de kultivar la alegria de bivir, tal ke mo lo mostraron Spinoza i Nietzsche.
La alegria es el sinyo de un enfortesimyento de muestro poder vital ke mos pusha a utilizar ‘una lojika de vida’ kontra ‘una lojika de muerte’, lo ke es un akto de rezistensya individual.”
Ma komo kultivar la alegria? fue la segunda pregunta del djornalisto, a la kuala Frederic Lenoir dyo la repuesta sigyente: “Es verdad ke la alegria no se puede otomatikamente dekretar, ma asta un syerto grado la kriansa humana puede krear una atmosfera mas o menos favoravle, ser por egzempyo atentiva a todos los chikos plazeres ke la vida prokura, i (sovre todo) desvelopar en eya ‘kualidades de prezensya i ayudo por sus proksimos’.
Por seguro ke esto no es fasil a realizar, ma el grande paradokso de la alegria es ke eya puede egzistir aun todas las sufriensas i difikultades de la egzistensya.
Desde el empesijo del venten siglo para munchos intelektuales “la alegria” reprezenta un sentimyento naivo, una emosyon ke no responde al real rasyonalizmo i ansi los filozofos kontemporeanos preferan avlar unikamente del kontenido trajiko de la vida i de la eternal prezensya del ‘mal’. Nietszche de su parte fue en mizmo tyempo un grande pensador del trajiko i tambyen un grande filozofo de la alegria tal ke lo fueron Spinoza i Montaigne, los kualos pensavan ke aun todas sus difikultades i sufriensas, la verdadera esensya de la vida era de azer aumentar lo mas posivle el potensyal de alegria ke la persona yeva en eya mizma.
El djornalisto esta vez pregunto: “Es ke tenesh personalmente syertos konsejos a dar?” La repuesta fue simple: “Si…antes de todo kale desvelopar muestra kualidad de atensyon i de prezensya en direksyon de los otros, ser konsyentes tambyen de los chikos plazeres de la egzistensya kotidyana i sovre todo ambezarmos a agradeser la vida i no syempre kesharmos… Una otra kualidad a kultivar es la perseverensya en muestros esforsos, i tambyen el akto de estableser relasyones de amistad i kerensya kon muestro entorno, saver dar i saver partajar.”
No mos olvidaremos ke ‘la alegria’ es un sentimyento mas intenso ke ‘el plazer’ porke eya sinyifika la plenitud de la vida.
“Por seguro ke esta manera de pensar puede pareser naiva, tal la manera de razonar de un muevo venido de la planeta Mars” adjunto el autor del livro, ma vos puedo asegurar ke enkontro munchas vezes personas para las kualas ‘la alegria de bivir’ reprezenta una koza ke es importante de kultivar porke eya es una de las prinsipales kondisyones de venser las difikultades i de no toparmos delantre el ovligo de syempre abokar la kavesa.
