İ de muevo, lagrimas i inkyetud, de muevo madres ke asperan sus ijos o ijas sin verlos retornar a kaza, de muevo amantes despartidos definitivamente por la muerte... de muevo esta anksyedad obsedante ke parese kerer engancharse por syempre al korason del mas riko komo tambyen del mas prove.
Djueves demanyana de la semana pasada, la Prensa mos ambezo ke en la Amerika del Norte, un terrivle asalto asasino fue perpetrado en San Bernardino/Kalifornya (en un sentro de akolyo para handikapados), por un ombre i una mujer pakistanezos, ‘el ombre’ nombrado Stad Faruk, puede ser engrandesido en los Estados Unidos, ‘su mujer’ nombrada Tasshfen Malik, nasida en el Pakistan ma engrandesida en Arabia i ke venia de djurar sometimyento al “Daesh/İşid, krimen absurdo, sin verdadero motivo personal, el kual provoko en baldes la muerte de 14 personas i firyo mas de vente otras.
Aunke al empesijo ninguna aluzyon no fue echa ofisyalmente konsernando la razon del krimen, todos los ke meldaron o oyeron avlar de este kavzo tuvyeron kaji immedyatamente el presentimyento ke se tratava de un atake terroristo de aspirasyon djihadista, lo ke en efekto fue konfirmado poko despues.
Desgrasyadamente, en Los Estados Unidos, en desparte de semejantes aktos enemigos, se ve tambyen kon grande frekuensya (partikularmente en espasyos estudyantinos o eskolaryos) aktos inhumanos perpetrados de parte de otoktones por razones vizivlemente inkomprensivles, praktikados kon armas libremente fabrikadas i vendidas en el payis sovre baza de un vyejo prinsipyo de oto-defensya promulgado ay de esto 200 anyos, en la epoka ande el Norte i el Sud del payis estavan kaji en situasyon de gerra interyor.
Desde su primer mandato, el aktual Prezidente Barak Obama lucho kon fuersa por dos sujetos de grande importansa: A) “La nesesidad de un sistema de seguridad medikal para la totalidad de la populasyon”, i tambyen B) “La interdiksyon de la libre vendida sin ninguna vijilansya de armas de fuego” las kualas malorozamente permetyeron asta agora la realizasyon de multiples karnajes echos en momentos de ravya i inkonsyensya.
El primer sujeto obtuvo un rezultado se puede dezir parsyal; vinyendo al segundo, el Kongreso Amerikano (ande los republikanos son aktualmente en mayoria) no dyo kualkyer repuesta pozitiva i de muevo, en los Estados Unidos, se vende armas sin una verdadera vijilansya.
Oy, es muy difisil de no preguntar (sin ninguna esperansa de resivir kualkyer repuesta) kon kualas armas el horrivle karnaje de San Bernardino fue perpetrado?
En todo kavzo kale notar ke desde el 1 /1/2015 asta el 3/12/2015, en el espasyo de onze mezes i 3 dias, uvo en los Estados Unidos 12.219 personas matadas i 24000 feridos kon armas a fuego individuales.
Syempre en los Estados Unidos, en una fraksyon de 100.000 sitizanos, la proporsyon de muertes provokadas por golpes kriminales es de 3,7 por syen del shifro jeneral de los ke por varyas otras razones pyedren la vida, lo ke es realmente enorme en komparasyon a la Fransya o a varyos otros payizes evropeos ande este porsentaje es solo de 0,2.
Estos shifros produzen realmente una grande desepsyon en el korason de los fideles admiradores de la Amerika del Norte ke semos i eyos son la prova irrefutavle ke el maraviyozo payis ke admiramos kon fervor no es enteramente puevlado de syentifikos i ombres de grande sagasidad ma tambyen de simples mortales, kada uno kon su propyo karakter i sus propyas impulsyones.
Esto dicho, Los Estados Unidos kedaran syempre para munchos de entre mozotros un ekstraordinaryo manadero de adelantamyento humano i tambyen un refujyo en sirkunstansyas difisiles.
Muestra kerida kolavoradora Dora Niyego en dolyo
Ay de esto pokos dias, muestra kerida kolega Dora Niyego pyedro por syempre su madre:
Lusi Niyego
mujer de valor, fidel i muy kudyoza kompanyera de vida de Nesim Niyego el mizmo aktualmente bastante desrepozado, para el kual su prezensya era un grande soporte moral i sentimental.
Personalmente, la konosi mas o menos de serka, eya era dulse, kerensyoza i syempre sonriente ansi ke yena de komprensyon por la sufriensa de los otros.
Ke su alma repoze en paz!
Todas muestras kondolensyas a su marido Nesim Niyego, su ijo Moise Niyego ansi ke a sus ija i yerno “Dora i Henri Niyego” a la tristesa de los kualos partisipamos.
