Estamos bivyendo los ultimos diyas del anyo 2015. Mankan diyas kontados para el anyo muevo. Pensi “komo se puede empesar a un teksto pozitivo, alegre?”.Puede ser kon un chiko moabet ?...Deke no?..
En los “Diyas Temerozos” izimos kada uno, muestro egzamen de konsiensa. En esta fin de anyo, puedemos tambien azer un “bilanso” de los 12 mezes ke estamos deshando. Muy probavle ke en el presipyo del 2015 teniyamos proyektos, dezeos, esperansas. Par konsekuensa, izimos planos. Unos se realizaron otros no.
Yo kon mi optimismo abitual pensi: “El D. es grande…. Estaremos sanos i rezyos todo se aze”. Esto me izo evokar una anekdota ke tengo meldado antes un syerto tyempo. No me esto akodrando si la eskrivi mas antes…
“Esto pasa en una klasa myentres la lisyon de Filozofiya (si no me yerro).El Pofesor eskrivyo en el tablo el byervo ke vash a meldar. En efekto, no es un byervo. Es una fraza ansi redijida: “THEGODİSNOWHERE”…Los elevos deviyan azer sus komentaryos personal sovre lo ke entendyeron de este grupo de letras ke,a primera vista paresen no tener dinguna sinyifikasyon.
La entisyon del profesor (o el eskopo diremos) es klara. El, kon esta estratejiya kere konoser los optimistos i los pesimistos de su klasa. Keridos amigos i lektores, muy probavle ke los ke konosesh el İnglez, no vash a tener grande difikultad a komentar, a vuestra manera naturalmente.
Vinyendo a los elevos…Los pesimistos eskrivyeron ansi: “ THE GOD İS NOWHERE”, lo ke sinyifika “ D.no esta en dingun lugar”…Par kontra, los elevos del otro grupo disheron ansi:”The God is now here!”,lo ke vyene a dezir: “D. esta agora aki”, Asigun mi esto es la ekspresyon neta del optimismo i tambien de una kreensa solida, rezya.
Munchos dizen ke el optimismo es un dono i la buena umor tambien. No kero ke ayga algun malentendido. Mis propozitos asta agora, absolutamente no keren dizir ke se deve todo el tyempo mirar a la vida kon lunas roz o djugar kontinualmente a SER “Pollyanna”. Es yerro tambien no ver la mizerya, los problemas de la vida.
İ yo bivo en esta planeta, i yo tengo mis problemas, mis difikultades i vo pensando “kualas ke seyan las deziluzyones de ayer, oy tenemos muevas esperansas, tengo mas ardor de venser las difikultades”. Komo se puede definir el Optimismo? Para unos es komo dishimos mas ariva, un dono. Para otros, una tendensya a ver, a deskuvrir la vanda pozitiva de las personas, de la vida ets.. i a ser de buena umor. Ma atansyon!! Sin ser egoistos.
El ilustro eskrivano fransez Beaumarchais (1732-1799) tiene dicho : “Me esto apresurando de riir, del reselo de ser algun diya ovligado de yorar”. Reelmente no entendi esta konradiksyon, no la esto pudiendo komentar. Porke el fue el eskrivano de komedias, intrigas amuzantes en sus ovras komo “El Barbero de Sevilla, Figaro ets..”…
En metyendo el punto final, aki un mesaje anonimo. “Syendo un miembro de la populasyon aedada, oy demanyana me sinti orozo i de buena umor, de pueder alevantarme de la kama.. Kontente de tener un techo sovre mi kavesa.Kontente de pueder meldar mi primer e-mail del diya…Kontente de ser kapavle de emplear el klavye de mi komputadera…”
Kreyo ke no ay menester de komentaryo. Keridos lektores las frazas de ariva no son miyas, aun ke penso i yo egzaktamente lo mizmo. Son de una persona mas aedada ke mi. Sueto de korason ke el anyo 2016 no mos aga bushkar los anyos pasados. Rogo de korason ke muestros ijos, muestros inyetos bivan en un mundo de paz i ermandad.
