La semana ultima asistimos a un konser Sefarad ke se realizo por el provecho (yararına) de la mestra (yuva) Minix ke ampeso a la edukasyon de los chikos de edad de dos a sej anyos en el anyo 2007; i se topa en la parte Asiatica de Estambol.
El buto de esta eskola es de engrandeser, de kultivar (yetiştirmek) elevos ke van a ser developados kon armoniya kon el entorno, ke van a arrivar al punto al mas alto ke pueden alkansar i van a tener una vida kon vertud (erdem) i umana (insancıl).
Minix da una edukasyon sovre munchos puntos de vista komo por egezmpyo, linguas etranjeras, lavoros de proyektos diferentes, lavoro sovre los livros, las teknikas de sintir i pueder kontar lejandas (öykü), azer pinturas i ovras de arte (sanatsal çalışmalar), i otras aktivitades.
El koro es dirijado por İzzet Bana.
Por pueder engrandeser kriyaturas sanos (sağlıklı) kale ke los paryentes tengan una edukasyon igual; i por este kavzo se esta dando una grande emportansa a los programes de apoyo de los paryentes (ebeveyn destek programı). Komunikasyon (iletişim), aserkamyento pozitivo (pozitif yaklaşım), teknikas de topar solusyones a los problemes entre los chikos i los grandes, lavoros sovre ser atantivos, apoyo de pedagoges para pueder arivar a una vida de buena kualitad (kaliteli yaşam).
Para pueder azer esto todo kale tener moneda.
Kon un shef de orkestro nasido en Israel Ronen Nissan i una soprano Claudia Guarin nasida en Bogota Kolombiya se organizo una nochada reushida en el sentro kultural de Fulya kon la ayuda del prezidente de la munisipalitad de Beşiktaş.
Muncha djente, un salon bastante grande kon un kokteyl alavado a la entrada.
En primero un koro de los chikos kon İzzet Bana emosyonante i despues el konser Sefarad.
Ronen Nissan; lavora komo direktor en el teatro de la Opera de Viyana. El dirijo en el anyo 2014 la 9. Senfoniya De Beethoven kon la orkestra de Flarmoniya de Bohuslav Martinu, dirijo en la Polonya la Orkestra de ‘Flarmoniya de Opole’.
En su pais el dirijo munchos konseres kon las Orkestras de Flarmoniya de Israel, de Ashdod Senfoni i Natanya Kibbutz Orkestra. El es un gitaristo konosido en Viyana.
Reusho a azer su lesensya (lisans) en New York, en la eskola de muzika de ‘Mannes’.
Claudia Guarin estudyo en la Universitad de Musica en Viyana. Kuando era chica se ambezo en su pais a tanyer ‘Viola’ i se perfeksyono en la Orkestra de Senfoniya de Bogota. En 1999 es por la primera ves ke salyo a la shena en la opera ‘Sihirli Flüt’; despues en munchas ovras konosidas komo; ‘Hansel and Gretel’, ‘La Generala’ etc...
Claudia Guarin la Solo Soprano aseguro reushitades superyores (üstün başarı sağladı) en munchos konseres.
En los paises Viyana, Italya, Kolombiya, Rusiya, Fransya, Germanya, Polonya, Chekoslovakya, Hungariya, Slovakya partisipo a los Festivales de Muzika i fue agradesida en las televizyones.
Eya esta kontinuando sus estudyos para perfeksyonarse.
Veramente una boz maraviyoza, una boz de seda.
Unanochada byen organizada i kreygo ke fue fruktiva (verimli) por la favor de Minix.
Ay diferentes aktivitades organizadas en muestra komunitad ke veramente no se esta puedyendo alkansar de vez en kuando.
El lavoro de los volontaryos kon los profesyonales es muy grande para ekilibrar el buceto (bütçe) i para abasteser a todos los menesteres.
Fuersa buena a todos los donatores i los ke estan lavorando de alma i korason.
Azlaha i Beraha i el Dyo ke no mos Averguense NUNKA!
