En este empesijo del anyo kristyano 2016, de kualo avlar si no de İsrael.
Myerkoles pasado 30/12/2015:
“Fin del sinken mez” despues del horrivle krimen perpetrado por un grupo de adolesentes ultra relijyozos djudyos ke provoko voluntaryamente un insendyo en Duma al Norte de la Sisjordania, ande 3 myembros de la famiya Dawabshah (entre los kualos un ninyo de 18 mezes) toparon la muerte.
Vyernes el 1/1/ 2016: (Dia habitualmente de repozo en İsrael ande la mas parte de los sivdadinos van en las inombravles kafeterias de la sivdad para enkontrar amigos kon los kualos diskutir de la situasyon i de las ultimas peripesias de la semana) un ombre vestido de preto, deskonosido de toda la asistensya, entro en uno de estos espasyos rekreativos en Tel-Aviv i subitamente avrio fuego sovre la totalidad de la asistansya, lo ke kavzo la muerte de dos mansevos djudyos aedados entre aproksimativamente 20 i 25 anyos, i firyo syete otras personas sin ninguna razon vizivle.
Este drama del primer dia del anyo 2016 fue byen entendido kaji trajiko para el puevlo no solo İsraelyano ma tambyen djudyo en su totalidad….El fue perpetrado en el sentro mizmo de Tel Aviv, sivdad totalmente İsraelyana sin pasado antiguo… sivdad fraguada despues de la Shoah sovre espasyos arenozos ande no se topava la mas chika plantasyon, ovra de djudyos ke fueron feridos en sus karnes komo tambyen en sus sentimyentos durante la segunda gerra mundyal, en una Evropa ke eyos adoravan ma de la kuala en su mayoriya (a la eksepsyon de unos kuantos kavzos de verdadera solidaridad) la populasyon kristyana kedo mas o menos indiferente al drama djudyo … enfin, sivdad simbolika ande se afirmo la viktorya de la “voluntad de egzistir” kontra la “lasitud i el dezespero” de un puevlo ke bivyo 2000 anyos sin tyerra propya, i tambyen ande ombres i mujeres, los unos savyos, doktores o indjenyores, los otros simples ovreros, adjuntaron sus esforsos en kompleta igualidad, afin de tener un refujyo por syempre.
Komo eksplikar este akto al pareser sin motivo prechizo, ma vizivlemente empapado de odyo? Si no por una revolta syega i puede ser inkonsyente?
İ de muevo va reempesar en la sivdad la mas biva del payis ande las luzes no se amatan kaji nunka, la terrivle anksyedad de las madres ke no ven retornar a kaza los adolesentes auzados a salir solos a la kaye, de muevo tambyen en la diaspora ‘el terrivle apretamyento de korason’ de todos los ke tyenen aya ijos, inyetos o kualkyer otro kerido.
İmmedyatamente despues el kavzo, empeso la bushkida del asasino ke fuyo despues de aver perpetrado su akto kriminal. Al empesijo la polisia refuzo de dizir kualo ke sea konsernando lo ke pensava sovre este atake, si se tratava de un akto de simple kriminalidad o de terrorizmo. Ma poko despues (segun lo ke meldi) un honesto palestinyano de nasyonalidad İsraelyana,lavorante en el espasyo publiko del payis hebreo, deklaro ke puedria ser su propyo ijo depresivo i empapado de ravya (informasyon de la kuala no enkontri ninguna konfirmasyon ni ningun desmentido).
La razon real de la agresyon keda oy en dia impresiza. El proprietaryo del bar ande el drama se produzyo deklaro ke el agresor kedo un momento asentado sovre un banko antes de kitar un fuzil automatiko de su bolsa i de travar en direksyon de todos los klientes …de otra parte un filmo video transmetido por varyos medyas israelyanos mostra un ombre vestido de preto azyendo su empleo en un supermarketo antes de kitar de su sako una arma i travar frenetikamente sovre los ke se topavan a proksimidad; versyon del drama ke no koresponde a la deklarasyon presedente.
İ oy kontinuamos syempre a demandarmos “Kualo pudo ser el motivo real de este krimen afrozo? Kualo pudo pushar este joven arabo, al pareser de nasyonalidad İsraelyana, a travar sovre deskonosidos, al risko de pedrer por syempre su libertad?
Es ke se puede pensar a una vengansa intensa kontra el insendyo de la kaza de la famiya Dawabshah ke avia kavzado la muerte de 3 inosentes? o puede ser tambyen kontra (ay de esto unos kuantos dias) los balyes i las burlas de un grupo de haredim a la okazyon de la boda de uno de sus serkanos, kada uno un kuchiyo en la mano dando golpes para burakar una fotografia del desmazalado ninyo arabo ke muryo en la dicha trajedia?
Alhad 3/1/2016:
La prensa deklaro ke 4 djudyos seran enfin inkulpados en İsrael por terrorizmo anti-Arabo a la sigida de sus partisipasyon al mizmo insendyo asasino de la fin del mez de djulyo 2015.
Lunes 4/1/2016:
La Prensa mos anunsya ke el dia presedente (5 mezes despues de este mizmo kavzo kriminal perpetrado en Duma sovre tyerras Sisjordanyanas) dos haredim ultra relijyozos fueron inkulpados de parte de la Djustisya israelyana, por asasinato i komplisidad al asasinato.
Syertos komentadores pensan ke este kavzo kriminal avia provokado la aktual intifada palestinyana kon kuchiyos buen aguzados. En todo kavzo el avia susitado una muy fuerte reprobasyon de parte del puevlo hebreo el mizmo.
Syempre segun la Prensa, el Governo İsraelyano kere defenderse de kualkyer induljensya por los aktos kriminales de los ultra-relijyozos i mizmo Benyamin Netanyahu vijito personalmente el chiko Ahmad ke fue el solo reskapado de la famiya Dawabshah.
Kuando enfin tomaran fin estas trajedias entre dos puevlos ke kreyen al mizmo Dyo?
