Grasias a la konstansia ke le da una vokasion bien orientada, Maçoro alkansa a un buen rezultado en sus ovras.
Max nasio en Estambol en 1959. Desde su chikez, sintio una grande devosion por la pintura.
A los14anyos, empeso su verdadera afeksion por esta disiplina, kuando estudio pintura.
En 1977, eskapo el Liseo Saint Michel en Estambol. Se treslado a Paris para estudiar Jestion i Istoria del Arte en American University.
Entremientes, estudio arte, eskulptura, fotografia, en klases de selebrados maestros komo Paul Jerkins, Robert Bishop i GideonBachman.
Fue en este periodo ke Max realizo sus primeras grandes pinturas al olyo.
Retorno a Estambol en 1982 i partisipo a munchas ekspozisiones kolektivas i individuales entre 1991-1997 en Estambol.
Algunas de sus ovras forman parte de varias koleksiones, tanto en Turkiya komo en el etranjero...
Max Maçoro uza la jenetika kultural tanto en el proseso kreativo, komo en la eleksion de la kolor i konekta estos dos aspektos kon el tiempo, el espasio i la istoria. Las pinturas del artisto avlan de las leyes universales de la natura, aunke tambien eksploran los enkontros sosiales i emosionales.
Su pintura mostra un grande sentido de la kolor, a vezes tiene una piska de ironia a la ke auna el lenguaje metaforiko.
Todo su ovra konta siempre alguna koza, no solo la imajen, va mas aya i opina sovre muestra sosiedad, aziendolo a vezes desbolvido, kon amarga ironia, otras vezes kon umor.
La ovra de Max Maçoro rezulta siempre sorprendente. Poseda una grande kapachidad kreativa i un profondo konosimiento de la teknika, lo ke mos yeva a afirmar ke mos enkontramos delantre de un grande artisto.
Espero tambien ke MAX, kon ken ekspozimos en Barcelona, en 2014 (Artistas Sefardíes desde Estambol a Barcelona), no va tadrar tambien a eskrivir un livro sovre su enteresante konferensia konsernando LOS SEFARADES (Limmud 2015).
