Komo kaji todos ya lo savemos, kada akto inosente o kulpavle ke azemos ansi ke kada palavra ke dizimos o eskrivimos, tyenen envezes el poder de reperkutirsen mas tadre, en sirkunstansyas diferentes, sovre faktos ke se realizan la mas parte del tyempo ahuera de muestra voluntad.
Fue ansi de inombravles grandes savyos o prelatos de kualkyer kreensa (Djudia, Mahometyana o Kristyana) del pasado, los kualos sin ninguna intisyon de mal azer, aparejaron terrenos propisyos a aktos ke eyos nunka dezearon ver kumplir.
Oy en dia, munchos de entre mozotros se demandan: asta ke grado los primeros grandes kreentes ke eskrivyeron los Livros Santos ay de esto mas de mil anyos, puedian imajinar ke sus preseptos o dekretos (provablemente adekuados a sus epoka) ivan mas tadre provokar aktos reprehensivles?
Esto dicho, no se puede nyegar la kontribusyon de todo lo ke tenemos meldado o oyido anyos antes, sovre muestra manera aktual de pensar o de djuzgar.
Ansi, de ke orijen ke sean, es enorme el danyo vital ke aktualmente estos “gerreyadores atados a leyes antiguas ke matan i kortan al nombre de Dyo” azen no solo a los ke konsideran komo enemigos, ma sovre todo al puevlo del kual eyos son los desendyentes direktos.
Komo por seguro vo lo akodrarash: unos kuantos mezes antes, la fotografia del chiko kadavre de un ijiko sovre la oria de mar de un kazal serka de Bodrum avia provokado olas de jeneroza emosyon en varyos payizes evropeos, kada uno pronto a resivir i akudir lo mas posivle de estos desmazalados ke (al risko de afrontar las olas furyozas munchas vezes mortales de la mar Mediteranea) les demandavan refujyo.
Ma malorozamente “los muevos aktos de terrorizmo del mez de Novembre pasado en Fransya i partikolarmente el fakto ke entre los ke atakaron se topava mansevos de suditansya franseza nasidos i edukados en el payis de Descartes, ijos i ijas de los ke munchos anyos antes fueron los primeros migrantes afrikanos o aziatikos en Evropa” provokaron un djenero de hezitasyon en el esprito de los verdadores otoktones del kontinente.
Aktualmente se adjunta tambyen, la arrestasyon djueves pasado, en Kalifornia i en el Texas, de dos fujitivos del Oriente Medyo por intisyon de terrorizmo, dos palestinyanos nasidos en İrak i resividos en los Estados Unidos unos kuantos anyos antes en kualidad de refujyados.
İ, en Almanya, en Kolonya, las multiples agresyones ande mujeres fueron akosadas por ombres ajenos ke kijeron probavlemente abuzar de eyas, lo ke pusho Angela Merkel (eya syempre partizana de resivir lo mas posivle de migrantes) a ser muncho manko antusyasta a este sujeto.
İnevitavlemente estos faktos de chika o grande importansa despertaron en el esprito de la mayoria de los oksidentales, la sensasyon de un peligro permanente ke tyene komo objetivo prinsipal la “destruisyon total” de la sivilizasyon moderna bazada sovre preseptos de igualidad i de respekto mutual.
En este momento, ke sea en Londra, Paris, Bruksel, Almanya , Roma o byen otras grandes sivdades evropeas, domina ‘el dubyo de lo ke seran los dias a venir i el espanto ke ekstremistos se puedran topar en la immensa masa de fujitivos’.
P.S. a) Vyernes pasado, djusto una semana despues ke un akto asasino fue perpetrado por un arabo İsraelyano en Te-Aviv, ande dos de muestros korelijyonaryos pyedreron la vida i syete otros fueron feridos,el kulpavle fue persigido i inevitavlemente matado afin de evitar un mas grande shifro de viktimas.
b) Segun lo ke mos ambeza la revista elektronika ‘’Le Point’’, un profesor djudyo del ‘İnstituto Franko-Habraiko’ fue agresado sin gravedad, en Marsilya, por un adolesente de 15 anyos ke deklaro aver perpetrado su akto al nombre de Dyo i del grupo ‘Estado İslamiko ‘/İŞİD..
El tribunal de Marsilya avyo una enkuesta por ‘tentativa de asasinato’ i ‘apolojia del terrorizmo’.
