Esto es el titolo del livro de Erıc-Emmanuel Schmıtt. Konosi el nombre de Schmıtt en el anyo 2004 kuando meldi en su orijinal el sovredicho livro. Este lavoro fue tresladado al turko ansi ke otros, komo “Monsieur İbrahim et les fleurs du Coran”, ande el autor, kon una savor de konseja, esta relatando la estorya de amistad entre el “Bakkal”(épicier”) Turko de la Rue Bleue i Moise el chiko Djudio. Schmıtt es konsiderado en la literatura franseza, komo el fabulisto kontemporano de la fraternidad o si preferash, de la “ermandad.”. Una konsiderasyon byen meresida, despues de sus doz livros ke sitimos mas ariva i otros lavoros de la seriya “Cycle de l’İnvizible, donde vamos a relatar oy, una de las estoryas.
La Relijyon en su jeneralidad tiene un grande lugar en esta seriya.Los eroes son de diferentes relijyones o son “ateistos”… Schmıtt es tambien dramaturgo. Tuve la okazyon de ver en Estambol su piesa “Petits Crimes Conjugaux”(Chikos Krimenes Konjugal), tresladado al Turko.
La estorya ke va avlar oy, es un egzempyo de “Umanizmo”, de munchos puntos de vista. El autor esta tokando a un sujeto terrivle, enklavado en muestras memoryas: LA SHOA. Esta kontando la estorya de un relijyozo Beljikano ke salvo munchas kriaturas Djudias. La estorya de un karakter egzemplaryo, enfrente de tanta dezgrasya..
Bruxelles, en el anyo 1942… Alora ke famiyas enteras, famiyas Djudias, estan embiyadas a la muerte, el Pere Pons, esta tomando el chiko Djudio, Joseph Bernstein, debasho su proteksyon. Entonses, el chiko, aedado de 7 anyos, se va yamar “Joseph Bertin,” i va partajar la suerte de otros chikos Djudios, en una villa, serka la kapitala de Beljika. En esta ovra de salvasyon, una kazalina va ayudar.
El punto el mas inkreivle, ezmovyente de esta estorya es ke, el Pere Pons, no se esta kontentando de protejar i de salvar estas kriaturas. El, konsiente ke el Nazizmo, tyene la entisyon, no solamente de eliminar, de azer despareser vidas umanas i una rasa kompleta, ma tambyen de efasar el “DJUDAISMO,” en tal ke ideolojia. Alora, esta penando a guadrar i inkulkar la kultura Djudia a estas kriaturas, en un kanton de la eglisya transformado en “Sinagoga,” dandoles nosyones de la TORA, del TALMUD. Komo un muevo “NOAH”, el relijyozo esta azyendo su posivle para salvar el futuro de una nasyon, o a lo menos, de un grupo de esta nasyon.
Entre el diya, los chikos se estan komportando komo Kristyanos. Las noches, el papaz, azyendose,”Djudio,” les esta dando lisyones para mantener en vida, la lingua i las tradisyones ebraikas. Durante tres anyos, Joseph, kon la pureza i kuryozita de su edad, esta bushkando repuestas a sus kestyones sovre su identita. A la fin, los chikos son salvados, la bestia salvaje vensida. Joseph i el Pere Pons, van a kontinuar a estar syempre de la vanda de los opremidos. Van a mostrar un umanizmo, ke dinguna barbaria no va reushir a azer despareser.
El sujeto del livro, mos atristo, puede ser mos apreto el korason, ma, son faktos ke syempre devemos akodrar, nunka olvidar.Tambien, no devemos olvidar el mesaje de este livro: “Avra syempre una luz, una esperansa, todo el tyempo ke va aver en el mundo personas reelmente umanas.
Mi sueto es ke no kede en palavras, ke no kede en un suenyo…C.D
