Despues de la agresyon de un profesor djudyo del ‘Instituto franko hebraiko’ de parte de un adolesente de 15 o 16 anyos de relijyon Muzulmana konvertido al djihasizmo, triste evenemento ke se paso la semana pasada en Marsilya, sivdad ande se topa la segunda mas grande komunidad djudia de Fransya, el prezidente de su konsistoryo demando a sus myembros de remplasar la kipa (sinyo distinktivo de djudaizmo) por una kasketa mas diskreta afin de evitar la repetisyon de semejantes golpes ke puedran ser mortales .
El konsejo en kestyon desplazyo terrivlemente a una grande parte de los dirijentes komunitaryos de Paris, al Crif ansi ke al grande Rabino de Fransya los kualos insisten de nunka renunsyar a la kipa, lo ke puedra entonses ser konsiderado komo un sinyo de espanto i de sometimyento a la voluntad del enemigo.
‘Dos konseptos diferentes ma de esensya semejante’ se topan ansi konfrontados el uno al otro todo en syendo kada uno portador de una grande valor djudia; el primer mos ordona el “respekto de la vida’’, el segundo “el respekto de muestra libertad”: Kual eskojer?
Si no ay la vida, no ay i no puedra nunka aver un kualkyer akto de libertad i de otra parte, si no luchamos para mentener muestra libertad a kualo servira la egzistensya de la sola kriansa mas o menos lusida i responsavle de sus aktos ‘el ombre’ .
Este eternal ovligo de dover a kada momento azer una mueva opsyon es el destino del puevlo djudyo, kondanado a syempre refleshir antes de azer el mas chiko paso o dezir la palavra la mas inosente .
Ansi , envezes mos demandamos kualo es realmente la kultura djudia echa simultaneamente de prudensya i de ozadia, ansi ke de refleksyon i de espontaneidad, elementos sosyo kulturales de muestro puevlo, los kualos todo en syendo kontraryos los unos a los otros se kompletan entre eyos.
Eya por seguro es kompuesta de dekretos i prinsipyos imperativos yenos munchas vezes de Sehel komo tambyen de Voluntad, ma a la sola kondisyon de syempre adaptarlos a las sirkunstansyas del momento.
A kada uno de mis lektores de pensar i de dar su opinyon?
