Franz Kafka i el djudaizmo -1

Todos savemos ke en los dyezimueven i venten siglos, uvo un shifro konsideravle de syentifikos, medikos, avokatos o indjenyores komo tambyen de filozofos , pensadores i eskritores djudyos ke kontribueron, a un ritmo mas o menos intensivo, a la evolusyon de la sivilizasyon del mundo oksidental . I desde un largo tyempo tengo personalmente el dezeo de saver lo ke fue i es aktualmente la relasyon de kada uno de entre eyos kon el Djudaizmo.       

Pensi empesar kon ‘Franz Kafka’ el ke entre eyos todos me parese ser el mas difisil a entender, sea en la seleksyon de sus sujetos, sea de mezmo en su ultima voluntad (konfiada a Max Brod en el kual el tenia una konfiansa kaji syega) de kemar despues de su muerte todo lo ke no avia sido editado durante su vida, lo ke por seguro su amigo refuzo de egzekutir.

Grasyas al kompyuter ke mos avre mas anchas las puertas de la konosensya, topi a este sujeto un largo teksto editado por el ‘Cercle Bernard Lazar de Grenoble’ entitolado ‘Une lecture juive de Kafka’ del kual vos kero dar (en dos o tres artikolos) la traduksyon ‘no literal’ en Djudeo Espanyol del rezumen de unos kuantos paragrafos.

Franz Kafka nasyo en el anyo 1883 en Praga, sivdad ke azia parte del Imperyo Austro Hungarezo, el kual durante el reynado de Fransua Jozef, avia akordado a los djudyos ‘los mizmos derechos ke la Revolusyon Franseza avia ofresido a sus sitizanos de orijen hebrea’.

El fakto fue konsiderado entonses komo una real liberasyon para los djudyos ke asta este momento avian sido sometidos a una verdadera deskriminasyon ke los ovligava a bivir de una manera muy estrecha en lugares ke les eran apropyados i ande, afin de amenguar la populasyon djudia, solo el primer nasido de una famiya tenia mas tadre la permisyon de kazarse.

Ansi Franz Kafka asistyo en su chikes a un trokamyento radikal del modo de egzistensya djudia no solo en su entorno sosyal, ma tambyen al interyor mizmo de su propya famiya , la kuala sin provablemente pensar a una kualkyer konversyon, se topava en situasyon de asimilasyon.

Es verdad ke en su ninyes esta situasyon no era para el ‘un problema’ ma mas tadre gradualmente el empeso a sintirse un poko en egzilyo en esta atmosfera de ‘perpetual aserkamyento kon la relijyon i la manera de pensar i bivir del payis’ fakto ke el konsiderava munchas vezes komo una doloroza pedrita de identidad.

El avuelo paternal de Franz Kafka era de orijen mas o menos rural ande se avlava el Yiddish, el Chek i un poko el Alman. En semejantes lugares, el estudyo de ‘tekstos de tradisyones’ en Yiddish i ‘la praktika de las Mitzvod’ eran las aktividades las mas importantes. El posedava una karneseria Kosher i su ijo Herman Kafka ( mas tadre padre del filozofo) ke avia echo unikamente estudyos eskolaryos elementaryos, era en su manseves kargado de yevar i entregar sus kompras a los klientes de su padre.

Byen entendido, esta situasyon troko poko a poko, lo ke le permetyo de devenir el mizmo un komersante ke mas tadre se instalo en Praga ande izo la konosensya de July Lovy (futura madre de Franz) la kuala era de situasyon sosyo kultural superyor i tenia mizmo en su famiya nombrozos savyos i grandes hahamim.

En una de sus novelas entitoladas ‘Josephine la kantadera’ o ‘El puevlo de ratones’ Franz Kafka evoko la chikes de su padre, epoka ande los djudyos son reprezentados komo ratones persekutidos, de loskualos los ijos no tyenen el tyempo de ser ninyos.

Herman Kafka kijo para su ijo una edukasyon muncho mas ancha ke puedra avrir para el las puertas del adelantamyento sosyal i puede ser de una syerta modernizasyon de su manera de bivir. Ansi Franz Kafka izo sus estudyos primaryos i segundaryos en eskolas almanas i mas tadre, estudyos universitaryos de ‘Syensya Juridika’ de lakuala se topa trasas en munchas de sus ovras.

Durante sus estudyos eskolaryos komo universitaryos Kafka no se interesava al Djudaizmo. Komo el mizmo lo eskrivyo mas tadre en un teksto intitulado ‘La lettre au père’ (la letra al padre) no le plazia akompanyar sus djenitores a la sinagoga, por la simple razon ke no entendia las orasyones eskritas en Hebreo .

A un momento uvo mizmo en Franz Kafka un djenero si no de verdadero aleshamyento, ma provablemente de indiferensya pasajera por el djudaizmo, lo ke prova el fakto sigyente : ‘Un grave insidente de antisemitizmo se avia produzido en Praga en el anyo 1901, una rumor sin fundamyento de asasinato ritual perpetrado por djudyos, rumor ke avia provokado violentes manifestasyones en multiples kalejas de la sivdad’ sujeto del kual ninguna trasa no figura en sus tekstos.

Es mas tadre ke la atitud de Franz Kafka enfrente del Djudaismo troko radikalmente debasho la influensa de sus amigos ke eran kaji todos djudyos i sovre todo, sovre todo, debasho la influensa de un grupo teatral Yiddish.

A kontinuar…